Barcelona dhe Aston Villa hyjnë në garë për Folarin Balogun

Barcelona dhe Aston Villa janë bërë pjesë e garës për transferimin e sulmuesit të Monacos, Folarin Balogun, duke e bërë edhe më të paqartë të ardhmen e tij.

Sipas L’Equipe, të dy klubet kanë shfaqur interesim për reprezentuesin e Shteteve të Bashkuara, ndërsa Monaco po vlerëson mundësitë për të ardhmen e 25-vjeçarit.

Tottenhami, megjithatë, mbetet skuadra që ka ndërmarrë veprimin më konkret deri tani. Klubi londinez ka hapur bisedimet me Monacon për një marrëveshje të mundshme.

Për kartonin e Balogunit, klubi francez kërkon afërsisht 60 milionë euro.

Ndërkohë, interesimi i Newcastle United për sulmuesin amerikan thuhet se është zbehur. Kjo situatë u ka dhënë më shumë hapësirë Tottenhamit, Barcelonës dhe Aston Villës në këtë garë.

Balogun është i lidhur me Monacon me kontratë deri në qershor të vitit 2028, por situata e tij mund të ndryshojë para përfundimit të afatit kalimtar.

Ai vjen pas një sezoni pozitiv, në të cilin shënoi 19 gola në 43 ndeshje në të gjitha garat. Po ashtu, sulmuesi ishte ndër futbollistët kryesorë të përfaqësueses së SHBA-së në Kupën e Botës 2026.

Edhe pse për të janë interesuar disa klube të mëdha, Balogun vazhdon të stërvitet rregullisht me Monacon. Megjithatë, skuadra franceze është e gatshme të shqyrtojë ofertat që mund të mbërrijnë për të.