Ballkani merr fitoren e parë të sezonit, mposht Vushtrrinë në Suharekë

Ballkani ka siguruar tri pikët e para në edicionin e ri të Albi Mall Superligës së Kosovës, pasi në stadiumin e qytetit në Suharekë fitoi 2-1 ndaj Vushtrrisë.

45 minutat e para të përballjes së vlefshme për xhiron e dytë përfunduan me rrjeta të paprekura. Të dyja skuadrat krijuan mundësi shënimi, por asnjëra nuk arriti ta kthente rastin në gol.

Skuadra vendase e rriti ritmin pas pushimit dhe në minutën e 64-t kaloi në avantazh. Giovanni goditi saktë nga distanca, duke realizuar një gol të bukur për 1-0.

Ballkani vijoi të ishte në kërkim të golit të dytë, të cilin e gjeti në minutat e fundit të takimit. Albin Berisha shënoi për 2-0 dhe e afroi ekipin e Suharekës me fitoren.

Vushtrria reagoi në fund dhe nuk e pranoi dorëzimin. Në minutën e 95-të, mysafirët shënuan golin e ngushtimit të rezultatit, duke e çuar ndeshjen në 2-1.

Koha e mbetur nuk mjaftoi për një tjetër ndryshim të rezultatit, ndaj Ballkani e mbajti avantazhin deri në sinjalizimin përfundimtar të arbitrit.

Me këtë sukses, Ballkani rikuperon pas disfatës nga Prishtina në javën e parë dhe regjistron pikët e para të sezonit.

Vushtrria, ndërkohë, vazhdon të jetë pa pikë pas dy xhirove, teksa pësoi humbjen e dytë radhazi.