Atl. Madrid heq dorë nga Vlahoviç, pranë firmës me brazilianin

Gara e fortë dhe çmimi i lartë i pretenduar nga klubi i Fiorentinës, kanë bërë që Atletico Madrid të heqë dorë nga sulmuesi serb Dussan Vlahovic. Lajmi konfirmohet nga prestigjozja “Sky” që raporton se Los Colchoneros janë vetëm një hap larg zyrtarizimit të blerjes së brazilianit Mathaus Cunha nga Hertha e Berlinit.

Klubi gjerman duket se ka vendosur të pranojë ofertën prej 30 milionë eurosh të spanjollëve për kartonin e brazilianit 22-vjeçar, i cili pritet të fluturojë drejt Madridit për të kryer vizitat mjekësore e për të hedhur firmën mbi kontratë.

Matheus Cunha ka luajtur tre sezone në Bundesligën gjermane, një vit e gjysmë me Leipzig dhe po kaq me Herthën e Berlinit, por pikërisht në klubin kryeqytetas ka spikatur si sulmues i dytë, duke shënuar edhe 8 gola në sezonin që lamë pas.

Në “Wanda Metropolitana” braziliani do të ketë misionin të bëjë partnerin e Luis Suarez, apo të zëvendësojë veteranin uruguaian në majë të sulmit, duke qenë se vitet mbi supe të tij nuk ofrojnë garanci për të përballuar një sezon intensiv.