“Ata janë miqtë tanë të futbollit, ne shkojmë për sport” – Stojkovic flet për sigurinë në ndeshjen Shqipëri-Serbi

Përzgjedhësi i Serbisë, Dragan Stojković, ka kërkuar të ulë tonet para ndeshjes mes Shqipërisë dhe Serbisë që do të zhvillohet më 7 qershor në Tiranë, në kuadër të kualifikueseve për Kupën e Botës.

Në një konferencë për shtyp, Stojković tha se kjo është një ndeshje e rëndësishme për të dy kombëtaret, por nuk duhet të kalojë përtej kuadrit sportiv.

“Ata janë miqtë tanë të futbollit. Shkojmë për të luajtur, për të parë kush është më i mirë në fushë. Nuk ka vend për tensione politike apo mesazhe nga tifozë ekstremistë. Kjo nuk na intereson dhe nuk do të ndodhë”, theksoi ai.

I njohur si “Pixi”, trajneri serb tha se pret një mikpritje të mirë në Shqipëri dhe vlerësoi organizimin e ndeshjes në Tiranë, duke theksuar se gjithçka do të jetë nën kontroll të plotë.

Ai foli me respekt për Kombëtaren shqiptare, duke përmendur cilësinë e lojtarëve që aktivizohen në kampionatet më të forta të Evropës dhe atmosferën e madhe që pritet në stadium.

“Kërkohen dy milionë bileta, por asnjë stadium nuk i mban. Ka rivalitet, por atmosfera është normale. I shohim si miq sportivë – dhe ashtu na shohin edhe ata”, përfundoi Stojković.