Ata flasin shumë”, Amorim rikthen kritikat ndaj legjendave të Manchester Unitedit

Ruben Amorim ka rihapur debatin me ish-figurat e njohura të Manchester Unitedit, duke sugjeruar se ato vazhdojnë ta vlerësojnë klubin sipas realitetit të një periudhe të kaluar. Trajneri portugez, i cili së fundmi mori drejtimin e Milanit, argumenton se komentet e vazhdueshme të ish-lojtarëve nuk pasqyronin kushtet moderne të futbollit dhe gjendjen aktuale të “Djajve të Kuq”.

Gjatë periudhës së tij në stolin e Manchester Unitedit, Amorim u përball me një sërë problemesh në përpjekjen për ta rikthyer ekipin në nivelet e dikurshme. Me të në drejtim, klubi shënoi renditjen më të dobët në historinë e tij në Ligën Premier, ndërsa në 63 paraqitje në të gjitha kompeticionet regjistroi vetëm 24 fitore.

Rezultatet e krijuan terrenin për kritika nga ish-legjendat e klubit, mes tyre Gary Neville, Roy Keane dhe Paul Scholes. Ata i përkisnin një kohe kur Unitedi dominonte dhe fitonte trofe rregullisht, veçanërisht gjatë viteve 1990 dhe 2000.

Kur u pyet për barrën e drejtimit të një klubi me histori të madhe, ku ish-yjet reagojnë shpesh ndaj zhvillimeve, Amorim iu përgjigj me një thumbim të qartë. Sipas tij, disa prej tyre e gjykojnë situatën e sotme duke përdorur pritshmëritë e një epoke krejt tjetër.

“Kam qenë në një klub [Manchester United] në të kaluarën me shumë legjenda, dhe ata kanë opinione të forta dhe flasin shumë për gjëra të ndryshme. Ata kanë jetuar në një periudhë që ishte krejtësisht ndryshe”, deklaroi Amorim.

Pak para shkarkimit të Amorimit, Paul Scholes kishte thënë se portugezi nuk ishte “njeriu i duhur” për postin dhe se nuk e kuptonte klubin. Amorim ishte kundërpërgjigjur duke theksuar se ish-figurat e Unitedit po e vlerësonin situatën e atëhershme me matësit e së kaluarës.

“Besoj se është normale. Mendoj se është fakt që unë, si trajner i Manchester Unitedit, po dështojmë të arrijmë atë që duhet. Duhet të kishim më shumë pikë, veçanërisht këtë sezon. Prandaj e pranoj natyrshëm”, kishte deklaruar ai.

“Ndonjëherë ata nuk i kanë të gjitha informacionet dhe e shohin Manchester Unitedin me standardet me të cilat kanë jetuar këtu, kur gjithmonë fitohej. Prandaj është e vështirë për ta ta shohin klubin e tyre në këtë situatë”, kishte shtuar Amorim.