Asnjë titull në lojë dhe paraqitje zhgënjyese, ultrasit e Milanit duan shkarkimin e Piolit

Eliminimi i Milan nga Europa League është një humbje e madhe në shumë aspekte. Kuqezinjtë e Piolit janë jashtë gare për çdo trofe tashmë, dhe kjo është një gjë që tifozëve të tyre nuk u pëlqen.

Të hënën në mbrëmje, Milan do të ketë dhe një ndeshje tepër të rëndësishme, atë të derbit të Milanos. Skuadra kuqezi do të përpiqet të mos humbasë këtë sfidë ndaj Interit, edhe pse zikaltërit duan të dalin me tre pikët për të vulosur titullin kampion të Italisë. Megjithatë, tifozët e Milanit janë tepër të irrituar me situatën e skuadrës së tyre dhe tashmë, bëjnë thirrje që të largohet Pioli dhe të afrohet një tjetër trajner.

“Curva Sud”, ultrasit e Milanit, kanë humbur durimin pas eliminimit nga Europa League ndaj Romës dhe kërkojnë “kokën” e Piolit.

“I dashur trajner. Dëshiroj të të kujtoj si arkitektin e një prej titujve më të bukur të historisë së Milanit, por kemi mbërritur në pikën ku rrugët duhet të ndahen në mënyrë të pashmangshme.

Dhe do të thoja se shumë prej ne tifozëve kanë pritur e duruar shumë gjatë. Sigurisht që nuk jam nga ata që drejtojnë gishtin tek individi, sepse të gjithë e kanë të qartë se faji për një sezon si ky duhet të ndahet në disa fronte!

Sigurisht që një vend i dytë nuk mund të na kënaqë dhe bëjë krenarë për Milanin tonë. Nëse alibia e grupit të hekurt vlen për Champions League, duhet pranuar gjithashtu se Kupa e Italisë dhe Europa League ishin objektiva të arritshëm. Në të cilët mund të fokusoheshim fort.

Duke i marrë parasysh të gjitha, ndryshimi i trajnerit tani është i domosdoshëm përballë një Milani që ka kohë që është i mërzitshëm. Pa lojë, konfuz, joadekuat dhe i papërgatitur, sidomos në ndeshjet vendimtare.

Milan me luhatje e kështu me radhë, një Milan që ka nevojë për ndryshim drejtimi. Për stimuj të rinj dhe mbi të gjitha për të rizbuluar lojën e humbur prej disa kohësh”, thekson Luca Luçi, kapo i ultrasve.