Arteta lartëson Merinon: Mesfushori spanjoll, ndër më inteligjentët që ka parë

Arsenali siguroi një fitore të thellë 4-2 ndaj Ipswich Town në kuadër të Carabao Cup, në një takim ku disa lojtarë lanë gjurmë.

Talenti 16-vjeçar Max Dowman ishte në qendër të vëmendjes pasi shënoi dy herë, ndërsa Noni Madueke dhe Mikel Merino plotësuan listën e golashënuesve për “topçinjtë”.

Merino, i cili e nisi ndeshjen me shiritin e kapitenit, gjeti rrugën e rrjetës në stadiumin “Portman Road”, duke marrë vlerësime të veçanta nga trajneri Mikel Arteta pas përfundimit të lojës.

Edhe pse në Premier League shpesh është përdorur si alternativë, mesfushori spanjoll kësaj radhe mori përsipër udhëheqjen e ekipit dhe e shpërbleu besimin e trajnerit me një paraqitje të mirë dhe një gol.

Pas ndeshjes, Arteta rezervoi vetëm superlativa për të. “Ai është thjesht fantastik. Mbi të gjitha, bën pjesë në grupin e lojtarëve më inteligjentë që kam vëzhguar dhe me të cilët kam bashkëpunuar,” u shpreh trajneri.

“Më pas vjen karakteri i tij. Ai thjesht synon të japë maksimumin për të gjithë. Kujdeset për çdo detaj, për secilin individ,” shtoi Arteta.

Trajneri theksoi gjithashtu veçoritë e rralla të lojtarit: “Ai zotëron cilësi unike në futboll dhe në ekipin tonë. Di të futet në zonë, të vendoset në hapësira të ndryshme, të luajë role të ndryshme dhe të krijojë lidhje me shokët e skuadrës.”

“Për një mesfushor, aftësia për të shënuar gola të tillë si ai i sonte është diçka e veçantë që nuk e kemi parë shpesh kohët e fundit, por kjo është një tjetër veçori e tij e jashtëzakonshme,” përfundoi Arteta.