Arsenali mbyll derën për largimin e Hincapies, Barcelona duhet të ndryshojë planet

Barcelona e kishte piketuar Piero Hincapien për të përforcuar mbrojtjen në janar, por Arsenali ka vendosur të mos e shesë gjatë afatit kalimtar të dimrit. Qëndrimi i klubit londinez përbën një pengesë të madhe për planet e transferimeve të katalanasve.

Fabrizio Romano raporton se Arsenali nuk është i gatshëm të hyjë në bisedime për largimin e mbrojtësit nga Amerika e Jugut, pavarësisht zërave të shumtë që e lidhin me Barcelonën.

Eksperti italian bëri të ditur gjithashtu se vëmendja për krahun e majtë në Camp Nou është përqendruar tani te Alejandro Balde. Ky i fundit do të ishte i gatshëm të largohej nga klubi katalanas në janar 2027, nëse gjendja e tij sportive nuk përmirësohet menjëherë.

Situata e qendërmbrojtësit ekuadorian po ndiqej nga afër në zyrat e Concha Espina dhe Camp Nou. Minutat e pakta që ai po merrte në “Emirates” shiheshin si një mundësi e favorshme.

Në sezonin 2026-2027, Hincapie ka luajtur deri tani vetëm 346 minuta. Te Gunners, ai është përdorur rregullisht si zëvendësues i italianit Riccardo Calafiori në të majtë të mbrojtjes. Megjithatë, trajneri Arteta i ka bërë të qartë komitetit sportiv se nuk dëshiron ta humbasë mbrojtësin në asnjë rrethanë.

Për trajnerin e lindur në San Sebastian, Hincapie është i pazëvendësueshëm falë sigurisë në duelet një kundër një, paraqitjeve sa herë aktivizohet dhe aftësisë për të luajtur si qendërmbrojtës apo mbrojtës i majtë.

Transfermarkt e vlerëson lojtarin me 50 milionë euro, ndërsa kontrata e tij afatgjatë zgjat deri më 30 qershor 2031. Në këto kushte, klubi anglez ka përjashtuar çdo ofertë për Decon gjatë merkatos së dimrit.