Argjentina bën përmbysjen e madhe ndaj Egjiptit dhe siguron çerekfinalen

Argjentina realizoi një nga kthesat më të bujshme të këtij Kampionati Botëror, duke e përmbysur Egjiptin nga 0-2 në 3-2 në çastet e fundit të një ndeshjeje të jashtëzakonshme dhe duke prerë biletën për në çerekfinale.

Skuadra e Lionel Scalonit e mori ndeshjen nën kontroll që në fillim, por ishte Egjipti ai që goditi i pari. Në minutën e 15-të, Yasser Ibrahim shfrytëzoi një harkim të Marwan Attias dhe shënoi me kokë, duke kaluar përpara ekipin afrikan.

Në minutën e 21-të, Argjentina fitoi një mundësi të artë për të rikthyer baraspeshën, pasi mori një penallti pas ndërhyrjes së Haissem Hassan. Sidoqoftë, Lionel Messi nuk arriti ta kthejë në gol, sepse portieri Mostafa Shobeir kuptoi krahun e goditjes dhe e priti penalltinë.

Edhe më pas, kampionët e botës vazhduan të këmbëngulnin në kërkim të golit, por Shobeir ishte protagonist absolut. Ai ndaloi fillimisht një tentativë të Julian Alvarez dhe më vonë reagoi edhe përballë Alexis Mac Allister, ndërsa Messi goditi shtyllën me një gjuajtje të fortë nga larg.

Me nisjen e pjesës së dytë, Egjipti u shfaq sërish i rrezikshëm dhe në minutën e 58-të i dha një tjetër goditje Argjentinës. Pas një kundërsulmi të shpejtë, Mostafa Zikon e dërgoi topin në rrjetë për shifrat 2-0.

Pas këtij episodi, ritmi i takimit ndryshoi. Lionel Scaloni hodhi në fushë Lautaro Martinezin dhe ndërhyrjet nga stoli i dhanë menjëherë një shtysë të re repartit ofensiv argjentinas.

Rikthimi nisi në minutën e 79-të, kur Lionel Messi shërbeu bukur në zonë për Cristian Romeron. Mbrojtësi kërceu më lart se kundërshtarët dhe shënoi me kokë, duke ngushtuar diferencën në 2-1.

Presioni argjentinas nuk u zbeh dhe vetëm katër minuta më pas erdhi edhe barazimi. Pas asistit të Gonzalo Montiel, Messi finalizoi me volej nga brenda zonës dhe topi përfundoi në rrjetë pasi preku pjesën e poshtme të traversës, për rezultatin 2-2.

Kur sfida po i afrohej fundit, Argjentina e mbylli përmbysjen e pabesueshme. Në minutën e 90+2-të, Lautaro Martinez dërgoi një krosim të fortë në zonë, ndërsa Enzo Fernandez u shkëput në mënyrë perfekte dhe shënoi nga afër për 3-2.

Nga një disavantazh 0-2 te triumfi 3-2, Argjentina dëshmoi karakterin, mentalitetin dhe frymën e një kampioni bote.

Edhe pse humbi penalltinë, Messi u përgjigj me një asist dhe një gol fantastik, ndërsa Romero dhe Enzo Fernandez vulosën një përmbysje që do të kujtohet gjatë.