Ansu Fati hap një kapitull të ri larg futbollit, ish-talenti i Barcelonës prezanton këngën e parë

Në një realitet tjetër, Ansu Fati mund të ishte sot një nga figurat kryesore të Spanjës në Kupën e Botës 2026 në Amerikën e Veriut.

Aktualisht, shpresa më e madhe e Spanjës mbështetet te Lamine Yamal, sensacioni 18-vjeçar që pati ndikim vendimtar në suksesin e kombëtares në Euro 2024 dy vjet më parë.

Para se Yamal të dilte në skenë, vëmendjen e botës së futbollit e kishte rrëmbyer një tjetër talent spanjoll i jashtëzakonshëm që vinte nga akademia e famshme La Masia.

Fati, i cili u transferua te Barcelona nga Sevilla kur ishte 10 vjeç, hyri në histori si golashënuesi më i ri i klubit në moshën 16 vjeç e 304 ditë. Më pas, ai vendosi edhe një rekord tjetër, duke u bërë futbollisti më i ri që realizon në Ligën e Kampionëve, në moshën 17 vjeç e 40 ditë.

Ky rekord mbetet ende në fuqi, pasi Yamal arriti të shënonte në të njëjtën moshë, por 28 ditë më vonë sesa Fati.

Në atë periudhë, shumëkush e shihte atë si trashëgimtarin e Lionel Messi te Barcelona. Edhe vetë Messi kishte thënë për të se talenti i ri “i ka të gjitha cilësitë për t’u bërë një lojtar i madh”.

Por në vend që të përgatitej për Kupën e tij të dytë të Botës me Spanjën, Fati duket se po përqendrohet në një rrugë krejtësisht tjetër.

Përmes TikTok-ut, ai bëri të ditur se shumë shpejt do të publikojë këngën e tij të re, ndërsa ndau me 2.2 milionë ndjekësit një pjesë nga projekti i tij debutues “Sea como sea”.

Videoja kaloi shifrën e tre milionë shikimeve dhe mori afro 450 mijë pëlqime. Megjithatë, nga rreth 5 mijë komentet e publikut, shumë prej tyre shprehën habi për drejtimin që ka marrë karriera e Fati në moshën vetëm 23-vjeçare.

Ylli i futbollit e ka prej kohësh pasion muzikën dhe tashmë ka firmosur një kontratë globale shpërndarjeje me Music Brokers, pjesë e Sony Music.

Ndërkaq, në Spotify, ku kënga e tij është publikuar tashmë, Fati ka pak më shumë se 200 ndjekës.