Alexander-Arnold nis kapitullin e dytë te Real Madridi, këtë herë nën drejtimin e Mourinhos

Kanë kaluar më shumë se 14 muaj që kur Trent Alexander-Arnold la Liverpoolin për Real Madridin. Tashmë, mbrojtësi anglez përgatitet për sezonin e tij të dytë në kryeqytetin spanjoll, me Jose Mourinhon në krye të skuadrës.

Real Madridi e zyrtarizoi transferimin e tij më 1 qershor 2025, një muaj përpara se t’i përfundonte kontrata me Liverpoolin, duke paguar rreth 10 milionë euro për ta marrë më herët.

Kur mbërriti te “Los Blancos”, pritshmëritë ndaj 27-vjeçarit ishin shumë të larta. Drejtuesit madrilenë e vlerësonin si një nga mbrojtësit më të kompletuar dhe më fleksibël në futbollin botëror, sidomos për ndikimin që mund të jepte përmes saktësisë në pasime, krosimeve, goditjeve standarde dhe përvojës në përballjet me presion të madh.

Sezoni i tij debutues në Madrid, megjithatë, nuk u zhvillua siç ishte parashikuar. Përshtatja me një kampionat dhe mjedis të panjohur, lëvizjet e shpeshta në stol dhe problemet fizike ndikuan drejtpërdrejt në paraqitjet e anglezit. Kjo situatë bëri që ai të mbetej edhe jashtë planeve të Anglisë për Botërorin.

Dy dëmtime të veçanta ia vështirësuan ndjeshëm vazhdimësinë. Në shtator, një problem në muskujt e pasmë të kofshës e mbajti larg fushave për shtatë javë, ndërsa dëmtimi i pësuar në kofshë gjatë dhjetorit e detyroi të mungonte për rreth dy muaj të tjerë.

Mungesat e shpeshta nuk e lejuan të gjente ritmin e duhur dhe as të krijonte një lidhje më të fortë me tifozët madrilenë.

Gjatë sezonit të kaluar, Alexander-Arnold u aktivizua në 35 nga 62 ndeshjet që Real Madridi zhvilloi në të gjitha garat. Në 27 prej këtyre takimeve ai e nisi si titullar, ndërsa minutat në krahun e djathtë i ndau me legjendën e klubit, Dani Carvajal.

Debati mbi aftësitë e tij në mbrojtje, që e kishte shoqëruar përgjatë gjithë periudhës te Liverpooli, vazhdoi edhe pas transferimit në Madrid. Në anën tjetër, loja me top mbeti një nga elementet më të rrezikshme dhe më të spikatura të repertorit të tij.

Ndonëse në disa raste e shfaqi nivelin e tij më të lartë, një pjesë e mbështetësve të Real Madridit mendonin se nuk kishin parë ende mjaftueshëm për të gjykuar ndikimin real të anglezit në skuadër.

Alexander-Arnold nisi ta rigjente gradualisht formën më të mirë drejt përfundimit të një edicioni zhgënjyes për klubin madrilen. Real Madridi nuk fitoi asnjë trofe madhor gjatë periudhës kur u drejtua nga Xabi Alonso dhe Alvaro Arbeloa.

Pas mbylljes së sezonit, mbrojtësi falënderoi tifozët për përkrahjen dhe bëri të ditur se tashmë ndihej tërësisht i përshtatur me jetën në Madrid.

Në mesazhin e tij, ai iu drejtua “Madridistas” duke theksuar se ishte pritur krahëhapur dhe se mbështetjen e kishte ndier që nga dita e parë. Alexander-Arnold pranoi se iu deshën disa muaj për të gjetur ritmin dhe për t’u ambientuar, por shtoi se tani ndihej plotësisht si në shtëpi.

Ndryshe nga pjesa më e madhe e futbollistëve të Real Madridit që morën pjesë në Botëror, anglezi pati mundësi të kryente një fazë të plotë përgatitore nën urdhrat e Jose Mourinhos. Trajneri portugez u rikthye në stolin madrilen në qershor, kur mori vendin e Arbeloas.

Raportimet bëjnë të ditur se Mourinho ka mbetur i kënaqur jo vetëm me paraqitjet e Alexander-Arnold, por edhe me cilësitë dhe larminë taktike që ai mund t’i ofrojë ekipit.

Në sytë e trajnerit portugez, anglezi nuk është një mbrojtës i djathtë i profilit klasik. Aftësia për t’u zhvendosur drejt qendrës së fushës dhe për të ndihmuar fazën sulmuese nga pozicione më të avancuara në mesfushë e bën atë një alternativë ndryshe.

Ndër armët kryesore të Alexander-Arnold vazhdojnë të jenë pasimet e gjata, krosimet, topat në thellësi dhe ekzekutimi i goditjeve standarde.

Edhe vetë futbollisti e ka mirëpritur bashkëpunimin me Mourinhon, duke e përshkruar si privilegj mundësinë për të punuar me teknikun portugez.

Alexander-Arnold tha se e ka admiruar gjithmonë trajnerin dhe kujtoi se ishte përballur disa herë me të, ndërsa tani e konsideron kënaqësi punën përkrah Mourinhos dhe stafit të tij.

Ai e përshkroi procesin si intensiv, për shkak të parimeve të trajnerit dhe standardeve shumë të larta që kërkohen. Anglezi shtoi se pret që, me njohjen më të mirë mes palëve, lojtarët të mësojnë gjithnjë e më shumë nga Mourinho.

Sipas tij, i gjithë grupi është i gatshëm dhe ka dëshirë të mësojë e të përparojë. Mbrojtësi u shpreh i bindur se portugezi do t’u japë shumë njohuri dhe do ta ndihmojë Real Madridin të fitojë trofe gjatë këtij sezoni.

Lufta për një vend në formacion është pjesë e zakonshme e realitetit te Real Madridi, ku pothuajse në çdo rol duhet të konkurrosh me futbollistë të klasit botëror.

Dani Carvajal u largua pasi i përfundoi kontrata me klubin, por rivaliteti për pozicionin e mbrojtësit të djathtë mbetet i fortë. Arsyeja është transferimi nga Interi i Denzel Dumfries.

Mbrojtësi holandez 30-vjeçar i shton skuadrës fuqi fizike, shpejtësi, energji dhe siguri më të madhe në aspektin mbrojtës.

Në miqësoren e fundit kundër Fiorentinës, që u mbyll me rezultatin 2-2, Mourinho vendosi t’i përdorte njëkohësisht të dy lojtarët. Alexander-Arnold u aktivizua në të djathtë të mbrojtjes, kurse Dumfries luajti më përpara në të njëjtin krah.

Gjatë kësaj ndeshjeje, anglezi mori përsipër edhe ekzekutimin e goditjeve standarde. Në fazën e ndërtimit të aksioneve ai u zhvendos shpesh drejt mesfushës, duke dëshmuar fleksibilitetin taktik që Mourinho mund të kërkojë prej tij.

Rritja e konkurrencës mund të shndërrohet në një shtysë shtesë për Alexander-Arnold, i cili synon të rikthehet në nivelin që e bëri një nga figurat më të rëndësishme të Liverpoolit. Me klubin anglez ai fitoi Ligën Premier, Ligën e Kampionëve dhe Kupën e Botës për Klube.

Shenjat pozitive të dhëna gjatë fazës përgatitore kanë shtuar shpresat e 27-vjeçarit se ky do të jetë sezoni kur më në fund do të lërë gjurmën e tij në “Santiago Bernabeu”.

Mourinho po punon për të krijuar një skuadër të aftë të rikthehet te triumfet në Spanjë dhe në Evropë. Brenda këtij projekti, Alexander-Arnold ka një mundësi të artë për të treguar se mund të shndërrohet në një nga figurat kryesore të ekipit.

Një sezon i madh me Real Madridin mund t’ia hapë sërish dyert e kombëtares angleze dhe ta rikthejë në planet e Thomas Tuchel.

Pas një viti të parë të mbushur me pengesa, përgjegjësia tani i takon Alexander-Arnold. Edicioni i tij i dytë në Madrid mund të përcaktojë nëse do të kthehet në një titullar të padiskutueshëm në “Santiago Bernabeu” apo do të vazhdojë të shihet si një lojtar me potencial të madh, por ende pa vazhdimësinë e nevojshme.