Albian Hajdari dëmtohet sërish, Hoffenheimi njofton mungesën disa-javore të kosovarit

Albian Hajdari është përballur me një tjetër dëmtim, vetëm pak ditë pasi ishte rikthyer në stërvitje. Hoffenheimi ka bërë të ditur se mbrojtësi do të qëndrojë jashtë fushës për disa javë.

Futbollisti i Përfaqësueses së Kosovës pësoi dëmtim gjatë seancës stërvitore të së martës, duke ndërprerë përsëri aktivitetin me klubin gjerman.

Përmes një njoftimi në faqen zyrtare, Hoffenheimi konfirmoi se Hajdari ka dëmtuar fashitin plantar.

“Albian Hajdari dëmtoi fashitin plantar gjatë stërvitjes së djeshme dhe nuk do të jetë i disponueshëm për disa javët e ardhshme”, thuhet në komunikatën e klubit.

Ky është një lajm i pafavorshëm për mbrojtësin, i cili vetëm pak ditë më parë ishte larguar nga grumbullimi i Kosovës për shkak të një problemi fizik. Për këtë arsye, ai nuk kishte mundur të luante në tri ndeshjet e fundit të Dardanëve në Ligën e Kombeve.

Hajdari sapo kishte nisur të stërvitej sërish me Hoffenheimin dhe synonte të rikthente formën për të qenë në dispozicion të trajnerit. Dëmtimi i ri e detyron të shtyjë edhe më tej rikthimin e tij.

Mungesa e tij për disa javë përbën shqetësim për Hoffenheimin, por edhe për Përfaqësuesen e Kosovës, ku mbrojtësi konsiderohet një prej opsioneve të rëndësishme në repartin e prapavijës.

Koha e rikuperimit dhe momenti i rikthimit në fushë do të varen nga ecuria e rehabilitimit të Hajdarit.