Agjenti i Endrickut mohon largimin e mundshëm nga Real Madridi

Endrick po përballet me një situatë të komplikuar në nisje të këtij sezoni, pasi sulmuesi brazilian nuk është përfshirë në planet e trajnerit Jose Mourinho dhe nuk ka pasur minutat që priste.

Pavarësisht rolit të kufizuar, lojtari nuk po planifikon të largohet nga Real Madridi. Agjenti i tij, Thiago Freitas, ka hedhur poshtë kategorikisht zërat se 20-vjeçari po shqyrton një të ardhme jashtë “Santiago Bernabeut”.

Pas fitores së Real Madridit ndaj Rayo Vallecanos në një përballje të luftuar, ku Kylian Mbappe udhëhoqi skuadrën drejt suksesit, konkurrenca në repartin ofensiv të madrilenëve mbetet e fortë.

Kjo garë për një vend në formacion e ka bërë edhe më të vështirë situatën e Endrickut. Braziliani u rikthye në Madrid pas huazimit te Olympique Lyon, por deri tani nuk ka mundur të bindë Mourinhon në fillim të këtij sezoni.

Për shkak të mungesës së hapësirave, disa klube nga Italia dhe Anglia kanë shfaqur interes për të, veçanërisht në prag të afatit kalimtar të janarit.

Megjithatë, nga kampi i futbollistit është përcjellë një qëndrim i prerë: Endrick synon të qëndrojë në Madrid dhe të luftojë për një vend në ekip.

“Endrick nuk ka kërkuar të largohet nga klubi dhe kurrë nuk më ka thënë se dëshiron të kërkojë një mundësi tjetër për të luajtur. Gjithçka që po thuhet në lidhje me këtë është plotësisht e pavërtetë dhe nuk ka ndodhur asgjë e tillë”, deklaroi Thiago Freitas për 365Scores.

Për rrjedhojë, edhe pse minutat e aktivizimit kanë qenë të pakta, Endrick vazhdon të jetë i përqendruar te Real Madridi dhe nuk duket se po mendon për një largim gjatë merkatos së janarit.