“S’mban më ujë pilafi”/ Çmimet në “qiell”, nisin protestat në Shqipëri

Në rrjetet sociale po përhapet me shpejtësi thirrja për protestë ditën e mërkurë në orën 18:00 në Tiranë përpara Kryeministrisë. Shkak i protestës është rritja e çmimeve dhe sidomos karburantit, teksa nafta ka shkuar gati 260 lekë/ litër.

“S’MBAN MË UJË PILAFI. Rritja e çmimeve s’ka të ndalur. Nafta ka arritur 258 lekë/litër, ndërsa vazhdojnë të rriten çmimet e ushqimeve dhe çdo produkti të domosdoshëm. Shumica dërrmuese e qytetarëve gdhihen çdo ditë e më të varfër, më të grabitur e të nëpërkëmbur.

Qeveria po dëshmon dita-ditës jo vetëm kapjen nga oligarkët, por edhe inkompetencë kriminale në administrimin e krizës. Oligarkët përfitojnë miliona euro subvencione, kurse më të varfrit marrin thërrime të cilave po u skadon afati. Ndërkohë që pjesa më e madhe e shoqërisë nuk përfiton asnjë masë lehtësuese, bordet qeveritare janë shndërruar në kartele ku përligjet rritja skandaloze e çmimeve.

Në këto kushte, të durosh është luks që s’mund t’ia lejojmë vetes. Askush nuk mund t’i varë shpresat te një qeveri hajdute, e kompromentuar dhe e paaftë. Populli duhet të marrë në dorë fatet e veta. Të mërkurën, ora 18:00, nga Sheshi “Skënderbej” drejt Kryeministrisë. Të gjithë në protestë” është thirrja për protestë, që pritet që të rikthehen pas atyre të disa muajve më parë.