Nëna u hodh në lumin Buna bashkë me tre fëmijët , kërkimet për trupat do të vijojnë dhe gjatë natës

Kërkimet nga njësia e specializuar e RENEA dhe Forca Kombëtare e Sigurisë Publike për gjetjen e trupave të nënës 39-vjeçare dhe dy fëmijëve të saj, që u hodhën në lumin Buna, do të vijojnë dhe përgjatë natës.

Ende nuk ka asnjë shenjë nga trupat e 39-vjeçares Alma Arrazi dhe dy fëmijët e saj të mitur, ndërkohë që vajza 9-vjeçare është gjetur e pajetë nga një peshkatar mbrëmjen e djeshme (4 maj).

Dyshohet se vetëflijimi i nënës së bashku me fëmijët është bërë për shkak të dhunës sistematike nga bashkëshorti, 31-vjeçari Ergys Arrazi, i cili tashmë është arrestuar nga policia.

NGJARJA:

Dy ditë më parë, 31-vjeçari Ergys Arrazi ka bërë denoncimin në polici se gruaja tij, Alma Arrazi bashkë me tre fëmijët, 9,8 dhe 3 vjeç janë zhdukur, por në të vërtetë pas kësaj zhdukje qëndronte dora e një babai dhunues, që ka detyruar nënën bashkë me tre të miturit të ndërmarrë aktin ekstrem.

Mbrëmjen e djeshme, një peshkatar i zonës ka gjetur të pajetë në ujërat e lumit Buna, vajzën 9 vjeçe. Por deri tani (5 maj, ora 20:00) nuk dihet ende fati i nënës, Almës 39 vjeçe se bashku me dy fëmijët e tjerë, 8 dhe 3 vjeç.

ARRESTIMI I 31-VJEÇARIT

Dëshmia e motrës së Almës, e cila ka deklaruar në polici se motra e saj dhunohej barbarisht dhe në mënyrë sistematike, por edhe dhuna në trupin e vajzës, kanë bindur policinë që të arrestojnë babain Erdgys Arrazi.

Pista kryesore që po heton policia është dhuna në familje e shkaktuar nga bashkëshorti 31-vjeçar, i cili është arrestuar në Shkodër pas deklaratave kontradiktore që ka dhënë në polici.

31 vjeçari, i cili më parë ka qenë i dënuar për kultivim të bimëve narkotike, akuzohet për veprën penale “Shkaktimi i vetëvrasjes”.

DËSHMIA E MOTRËS SË 39-VJEÇARES

Motra e Alma Arrazit, pas njoftimit se ajo dhe 3 fëmijët janë zhdukur ka shkuar në policinë e Shkodrës dhe ka treguar se Alma dhunohej barbarisht nga bashkëshorti bashkë me fëmijët.

Dëshmia e saj por dhe shenjat e dhunës në trupin e vogëlushes që u gjet e mbytur i krijuan bindjen policisë për ta vene në pranga Erdgys Arrazi për veprën penale të Shkaktimit të vetëvrasjes.