IuteCredit vonoi pagesën prej 18 mln euro, a ka kompania probleme me likuiditetin!?

Pagesa e interesit për obligacionet 12% të IuteCredit Finance nuk mbërriti në afat te të gjithë investitorët. Në qarqet financare dhe në media, kjo vonesë u pasqyrua si mungesë parash por që kompania  e mohon këtë diku ia atribuar vonesën sistemit ndërkombëtar të shlyerjes së letrave me vlerë.

IuteCredit Finance S.à r.l., kompania me seli në Luksemburg dhe në pronësi të plotë të grupit financiar estonez Iute Group, u përball në qershor me vonesa në shpërndarjen e një pagese prej rreth 18 milionë eurosh për mbajtësit e obligacioneve të saj “12% Senior Secured EUR 2025/2030”.

Pagesa përbënte kuponin gjashtëmujor të obligacioneve dhe duhej të kryhej më 6 qershor 2026. Megjithatë, më 15 qershor, nëntë ditë pas datës së përcaktuar, Iute Group konfirmoi publikisht se pagesa ende nuk ishte kredituar në llogaritë e të gjithë investitorëve, shkruan Albeu.com.

Shuma prej 18 milionë eurosh lidhet me faktin se obligacionet 2025/2030 kanë një normë interesi prej 12% në vit dhe, pas zgjerimit të emisionit në fillim të qershorit 2026, vlera totale e obligacioneve në qarkullim arriti në 300 milionë euro. Pagesat e interesit kryhen çdo gjashtë muaj, më 6 qershor dhe 6 dhjetor.

Vetëm një ditë përpara datës së pagesës së kuponit, më 5 qershor, Iute njoftoi për përfundimin dhe listimin e një emisioni shtesë prej 140 milionë eurosh, duke e çuar totalin e obligacioneve të kësaj serie në 300 milionë euro. Obligacionet tregtohen në tregun e rregulluar të Bursës së Frankfurtit dhe në Nasdaq Tallinn.

Iute: Paratë janë transferuar, problemi ishte te sistemi i shlyerjes

Në njoftimin e 15 qershorit, Iute Group mohoi kategorikisht që vonesa të lidhej me mungesë fondesh. Sipas kompanisë, rreth 18 milionë euro ishin transferuar sipas procedurës së përcaktuar, por pagesa nuk kishte kaluar ende te të gjithë zotëruesit e obligacioneve.

Procesi i pagesës përfshinte BPER Luxembourg SA si agjent pagues dhe Banque Internationale à Luxembourg (BIL) si depozitar qendror të letrave me vlerë në Luksemburg. Sipas Iute, problemi ishte shfaqur në fazat pasuese të procesit të shlyerjes përmes sistemeve ndërkombëtare të clearing-ut.

Kompania theksoi gjithashtu se e njëjta strukturë pagesash përdoret prej vitit 2019 dhe se pagesat e mëparshme të interesit dhe principalit ishin procesuar pa probleme të krahasueshme.

Dy ditë më vonë, më 17 qershor, Iute publikoi një sqarim tjetër, duke deklaruar se një “pjesë e konsiderueshme” e pagesës tashmë ishte kredituar te investitorët. Edhe në këtë komunikim kompania këmbënguli se nuk kishte probleme likuiditeti dhe se fondet ishin transferuar në kohë në llogarinë e përcaktuar.

Kostoja e financimit në rritje, fitimi bie

Megjithatë, të dhënat financiare më të fundit të vetë Iute Group tregojnë se grupi po përballet me një rritje të kostos së financimit.

Në rezultatet e publikuara më 27 gusht për gjashtëmujorin e parë të vitit 2026, Iute raportoi të ardhura totale prej 66.1 milionë eurosh, me rritje 11.1% në krahasim me një vit më parë, ndërsa EBITDA e rregulluar u rrit me 26.3%, në 30.6 milionë euro.

Nga ana tjetër, fitimi neto i raportuar ra me 38.2%, nga 6.7 milionë euro në 4.1 milionë euro. Vetë kompania e lidh këtë rënie, ndër të tjera, me kostot më të larta të financimit pas emetimeve të obligacioneve dhe rritjes së depozitave. Marzhi neto i interesit zbriti nga 22.9% në 18.6%.

Një tjetër tregues që meriton vëmendje është raporti i mbulimit të interesave, ose ICR, i cili në fund të gjashtëmujorit rezultoi 1.50 herë, pikërisht në nivelin minimal prej 1.50x të kërkuar nga kushtet e Eurobondit. Ndërkohë, raporti i kapitalizimit ishte 22.6%, mbi minimumin e kërkuar prej 15%. Kompania deklaroi se të dy kushtet financiare të obligacioneve ishin respektuar. /albeu.com/