Hipi mbi makinë teksa mjeti ishte në ecje dhe pengoi qarkullimin, gjobitet 20-vjeçari në Pogradec (VIDEO)

Drejtuesi i automjetit, shtetasi M. M., 20 vjeç, banues në Pogradec, është ndëshkuar nga shërbimet e Policisë Rrugore Korçë pasi ka kryer manovra të rrezikshme dhe ka penguar qarkullimin në një zonë të banuar. Videoja e tij e publikuar në portalin “JOQ” tregoi drejtuesin e makinës duke hipur mbi kabinën e automjetit dhe duke kryer manovra të kërcënuara për sigurinë e vet dhe të përdoruesve të tjerë të rrugës.

Pas verifikimeve, autoritetet identifikuan drejtuesin, i cili u ndëshkua me një masë administrative prej 75,000 lekësh dhe iu tërhoq leja e drejtimit.

Njoftimi i policisë:

Kreu manovra të rrezikshme dhe pengoi qarkullimin në zonë të banuar, shërbimet e Policisë Rrugore identifikojnë dhe ndëshkojnë me masë administrative 75 000 lekë, drejtuesin e automjetit, si dhe i tërheqin lejen e drejtimit.

Menjëherë pas publikimit të një video-je në portalin “JOQ”, në të cilën shfaqet një drejtues automjeti, i cili kryente manovra të rrezikshme në zonë të banuar, duke u bërë rrezik për veten dhe përdoruesit e tjerë të rrugës, shërbimet e Policisë Rrugore Korçë organizuan kontrollet me qëllim identifikimin dhe ndëshkimin e tij.

Nga verifikimet rezultoi se drejtuesi i automjetit, shtetasi M. M., 20 vjeç, banues në Pogradec, ka hipur mbi kabinën e automjetit, ka kryer manovra të rrezikshme dhe ka penguar qarkullimin, në zonë të banuar, ndërkohë që manovrat me timonin i ka kryer pasagjeri.

Për kundërvajtjet e kryera, konkretisht për shkelje të neneve 126, 139 dhe 170 të Kodit Rrugor, shtetasi M. M. u ndëshkua me masë administrative 75 000 lekë. Gjithashtu, 20-vjeçarit iu tërhoq leja e drejtimit.

Drejtoria Vendore e Policisë Korçë apelon për të gjithë përdoruesit e rrugës, që të respektojnë rregullat e qarkullimit rrugor, me qëllim mbrojtjen e jetës dhe garantimin e sigurisë rrugore.