Vanessa Paradis dhe bashkëshorti i saj i japin fund martesës pas tetë vitesh

Këngëtarja dhe aktorja franceze Vanessa Paradis është ndarë nga regjisori dhe shkrimtari Samuel Bensetrit, pas 10 vitesh lidhjeje dhe tetë vitesh martesë.

Lajmi u konfirmua të enjten, më 6 gusht, kur menaxheri i artistes 53-vjeçare i përcolli Agjencisë Franceze të Lajmeve (AFP) një deklaratë të shkurtër.

Sipas njoftimit, ndarja erdhi si rezultat i një vendimi të përbashkët. Edhe pse martesa e tyre ka përfunduar, ata vazhdojnë të kenë dashuri dhe respekt për njëri-tjetrin.

“Vanessa Paradis dhe Samuel Bensetrit bëjnë të ditur bashkërisht se janë ndarë, ndërsa vazhdojnë të ruajnë dashurinë dhe respektin që kanë ende për njëri-tjetrin”, theksohet në deklaratë.

Marrëdhënia e Paradis me Bensetrit filloi në vitin 2016, ndërsa kurorëzimi i tyre u zhvillua në Francë më 30 qershor 2018.

Paradis hyri në botën e artit që në moshë të vogël. Ajo fitoi famë ndërkombëtare në muzikë falë hitit “Joe le taxi”, ndërkohë që zhvilloi me sukses edhe karrierën kinematografike. Ndër interpretimet e saj më të njohura është roli në filmin romantik “L’Arnacoeur”, të vitit 2010.

Në jetën e saj personale, artistja pati një lidhje afatgjatë me aktorin Johnny Depp. Ata qëndruan bashkë nga viti 1998 deri në vitin 2012 dhe janë prindër të dy fëmijëve, Lily-Rose dhe Jack Depp.

Përpara se të lidhej me Bensetrit, Paradis kishte pasur gjithashtu një marrëdhënie me këngëtarin francez Benjamin Biolay.

Ndërkohë, Samuel Bensetrit ka një veprimtari shumëvjeçare në letërsi, teatër dhe kinema. Në cilësinë e regjisorit, ai ka realizuar filma si “J’ai toujours rêvé d’être un gangster” dhe “Asphalte”, si dhe ka punuar në teatër. Bensetrit është po ashtu autor i disa veprave letrare, përfshirë “Reviens” dhe “La Nuit avec ma femme”.