Tha se e kishte ngacmuar seksualisht Saimir Kodra, Egla Ceno pasi u dënua për shpifje: Do t’i shkoj deri në fund

Aktorja Egla Ceno ka reaguar publikisht pas vendimit të Gjykatës së Tiranës, e cila e shpalli fajtore për shpifje kundër Saimir Kodrës. Egla u dënua me 1 milionë lekë të vjetra gjobë ndërsa Kodra u cilësua palë e dëmtuar.

Ceno refuzon të komentojë vendimin e gjykatës, ndërsa tregon se është njoftuar nga avokati i saj pasi nuk ka qenë e pranishme në seancë.

“Nuk marr përsipër të flas për vendimin e gjykatës, ende nuk është zbardhur. Avokati më ka telefonuar, nuk kam qenë vetë prezente në seancë, avokati më tha që unë dënohem si fajtore dhe detyrohem të shkruaj në një media një përgënjeshtrim, ky është dënimi që avokati më tha që është marrë. Vendimi nuk është zbardhur, nuk dihet mbi ç’bazë arsyetimesh”, tha ajo.

Egla tha se nuk do ta lërë me kaq dhe se vendimi do të ankimohet në shkallët e tjera të gjyqësorit. E pyetur nëse ka pasur mundësi të flasë me Saimir Kodrën, Egla Ceno tha se gjërat që ka për të thënë do thuhen brenda institucioneve përkatëse. Nëse nuk e fiton betejën ligjore, Egla Ceno tha se nuk shuaj dot kureshtjen e askujt.

“Nuk më lidh asnjë me të. Çfarë kam pasur për t’i thënë, ka ndodhur brenda sallave të gjyqit. Gjërat që janë për të thënë do të zhvillohen brenda institucioneve përkatëse. Jemi para një fakti real që do ndiqet dhe do luhet hap pas hapi në instancat përkatëse.”

A mendon se i shërben kauzës së cilës i dedikohet, Egla Ceno u shpreh se kjo zhurmë që po bëhet, ndihmon që të çlirojë disa gra të tjera që nuk guxojnë e nuk flasin.

A ndihet e zhgënjyer, aktorja Ceno tha shkurt, “JO”. Nëse priste që dikush tjetër të fliste, Ceno tha se kjo nu kështë kauza e saj.

“Kam treguar një eksperiencë personale që ka ndodhur 25 vite më parë dhe e solla në sipërfaqe sërish me intentin që të flitet, të diskutohet, le të kushtojë çfarë të kushtojë, do i shkoj nga pas.”

Gjatë një deklarate televizive, aktorja dhe ish-banorja e “Big Brother VIP”, deklaroi se ishte ngacmuar seksualisht nga gazetari Saimir Kodra, kur kishte shkuar për punë. Rasti bëri bujë të madhe dhe gazetari njoftoi se do i drejtohej gjykatës.

Rasti përfundoi para togave të zeza dhe Egla Ceno është pyetur sërish për deklaratën e saj publike në dëm të Saimir Kodrës, ku raportohet se ka dhënë disa versione kontradiktore, çka ka bërë që Gjykata e Tiranës t’i gjejë ato të pabaza dhe ta shpallë aktore, fajtore.

Fillimisht, ajo deklaroi se kishte frikë të paraqitej në gjykatë. Më pas, në një tjetër deklarim, tha se nuk e kishte përmendur Saimir Kodrën, duke u justifikuar se kishte thënë vetëm mbiemrin “Kodra”, pa përmendur emër.

Në një seancë të mëvonshme, ajo ndryshoi sërish qëndrim, duke pohuar se deklaratat e saj nuk kishin të bënin me Saimir Kodrën personalisht, por me një kauzë simbolike për gratë e abuzuara seksualisht.