Sylvester Stallone rrëfen betejën me fizikun: “U bëra bulimik” dhe përdora steroide për “Rocky III

Pas figurës së heroit të fuqishëm që ndërtoi në filmat “Rocky” dhe “Rambo”, Sylvester Stallone ka zbuluar se fshihej një përballje e vështirë personale me fizikun e tij.

Në një intervistë për “The New York Times”, aktori 80-vjeçar foli për fiksimin që zhvilloi me pamjen trupore gjatë periudhës së suksesit të tij më të madh në Hollywood.

Gjatë përgatitjeve për “Rocky III”, Stallone tha se kishte arritur ta ulte yndyrën trupore në rreth 2.6%. Përpjekja për ta ruajtur këtë formë ekstreme, sipas tij, u shndërrua në një obsesion që çoi deri te bulimia.

“U bëra bulimik”, u shpreh aktori, duke kujtuar se ushqimi dhe pesha u kthyen në një konflikt të pandërprerë gjatë asaj kohe.

Stallone pranoi gjithashtu se kishte përdorur steroide për të mbajtur fizikun e kërkuar. Ai tregoi se i merrte në cikle gjashtëjavore, pas të cilave bënte gjashtë javë pushim, ndërsa theksoi se kjo mënyrë jetese pati pasoja të rënda mbi trupin e tij.

Pasojat e këtij presioni, aktori tha se i kuptoi më qartë vite më vonë, veçanërisht gjatë realizimit të “Cop Land”, ku duhej të paraqitej me një trup krejt të ndryshëm nga ai i personazhit Rocky.

Gjatë viteve, Stallone ka kryer nëntë ndërhyrje në shpinë, dy në shpatulla dhe tre në qafë. Ai pranoi se përpjekja e vazhdueshme për të ruajtur një fizik ekstrem i ka kushtuar shumë shëndetit të tij.

Rrëfimi i aktorit publikohet në prag të premierës së “I Play Rocky”, filmi që trajton historinë e realizimit të filmit të parë “Rocky” dhe që pritet të mbërrijë në kinema në nëntor.