Sandra Bullock rrëfen si po përballet me humbjen e Brian Randall: “Ende po mësoj

Sandra Bullock thotë se aktualisht po përjeton një periudhë lumturie të veçantë dhe se dhimbjet e së kaluarës e kanë ndihmuar ta shohë jetën me më shumë dashuri e shpresë.

Aktorja e vlerësuar me çmimin Oscar e ndau këtë reflektim gjatë një interviste në podcastin “SmartLess” të SiriusXM. Bullock ishte e ftuar për të promovuar filmin e ardhshëm “Practical Magic”, ku rikthehet në ekran përkrah Nicole Kidman.

Mes temave të bisedës ishte edhe ndarja nga jeta e partnerit të saj, Brian Randall. Ai vdiq në gusht të vitit 2023, në moshën 57-vjeçare, pas një beteje trevjeçare me sklerozën laterale amiotrofike (ALS).

Humbja e Randall, sipas aktores, e shtyu të mendonte më thellë për rrugëtimin e saj dhe mënyrën se si e përjeton jetën.

“Motra ime më dhuroi një kuti të bukur kallaji për ditëlindjen time. Në të ishte shkruar një citat i Leonardo da Vinçit, i cili rreth moshës 87-vjeçare kishte thënë: ‘Unë ende po mësoj’. Dhe mendova: ‘Ah, kjo është’. Mendoj se kjo është arsyeja pse ndihem kaq e lumtur nga brenda”, tregoi Bullock.

Ajo theksoi se, edhe pse mund të zemërohet ose të trishtohet për situata të ndryshme, tani përjeton një lloj lumturie që nuk e kishte njohur më parë.

“Jam jashtëzakonisht e lumtur dhe ndihem si fëmijë për herë të parë në jetën time, ndërsa shoh gjëra që i kam parë një milion herë më parë”, u shpreh aktorja.