Rita Petro: Seksi me dritë ndezur kërkon mendje të hapur, kërkesa për një grua të virgjër është standard

Poetja Rita Petro ishte e ftuar në programin “Top Fare” në Top Albania Radio, ku u përball me pyetjet pikante të moderatorëve Julian Hurdha dhe Anxhelo Shkreli.

Kur u pyet nëse e kishte më të vështirë të shkruante për seksin apo të diskutonte rreth tij në televizion, Petro shpjegoi se publiku shpesh e identifikon atë me personazhet e librave të saj.

Sipas poetes, të shkruarit bëhet në vetmi dhe i jep autorit lirinë të hedhë në letër gjithçka që i vjen në mendje. Ajo tha se censura nis në çastin kur vendoset nëse një tekst do të botohet apo jo. Ndryshe nga arti dhe shkrimi, gjatë një interviste duhet pasur gjithmonë parasysh etika, ndaj këto janë dy gjëra të ndryshme. Petro tregoi se pikërisht barazimi i saj me heroinat e librave ka sjellë keqkuptime, ndërsa njerëzit, pasi e dëgjojnë në televizion apo në intervista, i thonë të habitur se qenka një grua serioze.

E pyetur nëse një burrë me shumë partnere duhet cilësuar “kazanova” apo “legen”, poetja u përgjigj se do ta përfshinte te “legenët”.

Ndërsa për burrat që kërkojnë një grua të virgjër, Rita Petro deklaroi se kjo është “standard”.

Gjatë bisedës, ajo kujtoi edhe një vlerësim që i kishte bërë partneri i saj i ndjerë: aftësinë për t’u bërë njëkohësisht edhe shoqe e ngushtë e një burri.

Petro tregoi se partneri me të cilin kishte përjetuar historinë më të madhe të dashurisë së jetës i thoshte se zotëronte diçka të veçantë, pasi një burrë mund ta kishte shoqe të ngushtë, përveç aspekteve të tjera të marrëdhënies. Sipas tij, kur partnerja është njëherazi edhe mikja më e afërt, burri nuk dëshiron ta humbasë kurrë, edhe nëse ndien drithërima për dikë tjetër, sepse një raport i tillë është shumë i veçantë. Poetja shtoi se është jashtëzakonisht besnike si shoqe dhe se nuk e tradhton asnjëherë mikun apo mikeshën e ngushtë.

Në përgjigje të pyetjes se përse shqiptarët vazhdojnë të bëjnë seks me dritë të fikur, Petro e lidhi këtë sjellje edhe me mentalitetin.

Ajo kujtoi se dikur njerëzit banonin në dhoma të vogla dhe e ndanin hapësirën me të tjerë, ndërsa ndikonte edhe mendësia e kohës. Sipas saj, seksi me dritë ndezur kërkon shumë mendjehapje. Marrëdhënia intime është konsideruar ndonjëherë si diçka për të cilën duhet të turpërohesh, veçanërisht nga gratë. Petro tha se femrat nuk kanë qenë shumë të hapura, sepse mendonin se do të gjykoheshin, dhe shtoi se kjo mund të ndodhë edhe sot.