Rita Ora përballet me një padi prej 3.2 milionë paundësh nga ish-menaxherja e saj

Rita Ora ndodhet përballë një procesi gjyqësor të nisur nga ish-menaxherja e saj, Sarah Stennett, e cila kërkon nga këngëtarja një shumë që kalon 3 milionë paund.

Stennett drejtoi karrierën e Ritës që prej vitit 2009 dhe konsiderohet se pati një rol të rëndësishëm në suksesin e saj. Tashmë, kompania e saj, FAE Ventures, ka depozituar dokumentet përkatëse në Gjykatën e Lartë në Londër, duke pretenduar se artistja i detyrohet të paktën 3.2 milionë paund.

Sipas materialeve të paraqitura në gjykatë, këngëtarja akuzohet se ka shkelur marrëveshjen mes palëve, pasi nuk ka deklaruar dhe paguar pjesën e përcaktuar të të ardhurave nga turnetë dhe angazhimet televizive.

Një pjesë prej rreth 1.7 milionë paundësh lidhet me zbritje që FAE Ventures i konsideron të pajustifikuara. Këto përfshijnë shpenzime për reklama, shërbime kontabiliteti dhe sigurime.

Padia përfshin edhe të ardhurat nga “Phoenix World Tour”, i cili përfshiu shtatë shfaqje në arena të Mbretërisë së Bashkuar, mes tyre edhe një koncert në O2 Arena të Londrës.

Ish-menaxherja pretendon se gjatë viteve 2019–2020 nuk janë raportuar të ardhura nga ky turne në vlerën mbi 1.1 milionë paund.

FAE Ventures deklaron se komisionet e saj nuk janë llogaritur mbi të gjitha të ardhurat që Rita Ora kishte arkëtuar ose që ishin mbledhur në emër të saj.

Dokumentet gjyqësore përmendin gjithashtu dyshimin se në deklaratat financiare të dorëzuara nuk janë pasqyruar të ardhura koncertesh që mund të arrijnë deri në 6 milionë paund.

Në proces janë përfshirë edhe të ardhurat e Ritës nga “The Masked Singer”. FAE Ventures pretendon se komisionet për sezonin e pestë të programit janë bazuar në fatura që, sipas kompanisë, “nuk pasqyronin saktë” shumën që këngëtarja duhej të merrte në bazë të kontratës.

Sipas pretendimeve të ngritura para gjykatës, kjo situatë i ka shkaktuar kompanisë së Sarah Stennett një humbje prej afro 25 mijë paundësh.

Pas disa vitesh bashkëpunim, Stennett dhe Rita Ora u ndanë profesionalisht. Edhe pse në fillim shkëputja u perceptua si miqësore, mosmarrëveshja mes tyre tashmë është zhvendosur në sallën e gjyqit.

FAE Ventures kishte kërkuar edhe qasje në librat dhe dokumentet financiare të artistes, me qëllim verifikimin e pretendimeve të saj.

Sipas dokumenteve, kompania Y Royalties ka kryer auditimin e deklaratave financiare të Ritës për një periudhë gjashtëvjeçare, nga korriku 2018 deri në qershor 2024. Pala paditëse thotë se janë dorëzuar “disa, por jo të gjitha” dokumentet e kërkuara. Deri tani, Rita Ora nuk ka paraqitur mbrojtjen e saj ndaj padisë.