Pse Leonardo DiCaprio nuk dëshiron të bëhet regjisor?

Leonardo DiCaprio nuk ka plane të qëndrojë pas kameras si regjisor, të paktën jo në të ardhmen e afërt.

Aktori i famshëm mori pjesë në një bisedë me regjisorin e njohur Martin Scorsese si pjesë e eventit “Një vit në TIME” të revistës TIME, i cili u zhvillua në New York më 10 dhjetor. Gjatë bisedës së tyre, aktori pranoi se nuk ka dëshirë të bëjë regji, duke shpjeguar se mendon se nuk do të mund ta arrijë kurrë nivelin e Scorsese-s.

“Disa njerëz më kanë pyetur nëse do të doja të drejtoja. Dhe unë them: ‘Nuk do të doja kurrë të drejtoja. Nuk do të mund të bëja kurrë diçka si ajo që bën Martin Scorsese. Pse do të provoja?’ “

Ylli i filmit “The One Battle After Another” shtoi, megjithatë, se në disa nga veprat e tij të mëparshme ai dëshironte të kishte bërë një hap prapa dhe të “kishte vëzhguar” procesin e krijimit të një filmi në tërësi.

“Ju imitoni këta personazhe, përpiqeni të hyni sa më thellë në shpirtrat e tyre. Dhe do të kisha dashur të isha më shumë një spektator… për të parë atë që ju (Scorsese) bëni pas kameras “, tha ai.

“Duke parë prapa, do të doja ta kisha vëzhguar këtë proces pas kamerës shumë më nga afër“, shtoi ai.

Aktori fitues i çmimit Oscar i cili ka bashkëpunuar në gjashtë filma me Scorsese deri më sot foli gjithashtu për marrëdhënien e tyre unike krijuese, duke zbuluar se ata kalojnë “muaj” përgatitjeje dhe diskutimesh para se të fillojnë xhirimet.

“Ky është pak a shumë procesi ynë kur punojmë së bashku… aftësia për të folur për gati muaj, për të bërë pyetje të panumërta dhe për të luajtur rolin e avokatit të djallit se si t’i qasemi diçkaje, edhe nëse nuk është drejtimi më i dukshëm.”

Në mbyllje, ai shtoi: “Kjo është pikërisht ajo që po bëjmë në filmin e ri që po përgatisim aktualisht dhe mund të them se ka qenë një nga përvojat më të thella dhe kuptimplote të të nxënit në jetën time.”