Palestina e lirë” sjell tërheqje nga turneu i Ed Sheeran pas largimit të Macklemore

Pas përjashtimit të Macklemore nga koncertet, katër artistë dhe një grup muzikor që pritej të performonin në vijim të turneut të Ed Sheeran kanë bërë të ditur se nuk do të marrin më pjesë.

Vendimi për largimin e Macklemore u mor pas deklaratave të tij në mbështetje të Palestinës, të bëra gjatë një koncerti në New Jersey.

Finneas ishte i pari që njoftoi tërheqjen. Ai ishte planifikuar të hapte gjashtë koncertet e Sheeran në Amerikën e Jugut gjatë muajit nëntor, ndërsa në deklaratën e tij shprehu mbështetje për Palestinën dhe popullin palestinez.

Më pas, nga turneu u largua edhe këngëtari irlandez Aaron Rowe, i cili do të performonte në 10 datat e fundit të koncerteve në Amerikën e Veriut. Tërheqjen nga pjesa amerikane e turneut e njoftoi gjithashtu grupi irlandez Beoga, ndërsa më vonë të njëjtin hap ndërmori edhe grupi danez Lukas Graham.

Njoftimet për largimet u bënë disa orë pasi Ed Sheeran komentoi publikisht vendimin për Macklemore. Sipas këngëtarit, disa pronarë stadiumesh kishin refuzuar të zhvillonin koncertet nëse reperi do të qëndronte pjesë e turneut.

Sheeran tha se, pas përpjekjeve për të gjetur një zgjidhje, pronarët e ambienteve dhe organizatorët e kishin bërë përfundimtar qëndrimin e tyre. Ai shtoi se përgjegjësinë për largimin e Macklemore e kishte marrë vetë, pasi nuk dëshironte të zhgënjente fansat dhe as të linte pa punë ekipin apo artistët e tjerë të angazhuar në turne.

Robert Kraft, pronari i New England Patriots dhe i stadiumit Gillette, deklaroi se kundërshtimi ndaj Macklemore lidhej me komentet e tij të fundit, por edhe me atë që ai e cilësoi si një histori më të gjerë të retorikës dhe imazheve antisemite. Kraft u shpreh se do të ishte i gatshëm të zhvillonte një bisedë me reperin.