Nga takimi me Dianën në moshën 12-vjeçare te koleksioni i saj: Renae Plant shpenzoi 1.9 milionë dollarë në një ditë ankandi

Për amerikanen Renae Plant, ruajtja e sendeve të Princeshës Diana është kthyer në një angazhim personal që zgjat prej 12 vitesh. Koleksioni i saj, i cili po ngjall interesin e publikut, numëron më shumë se 800 veshje, aksesorë dhe objekte personale të princeshës së ndjerë.

Historia e lidhjes së saj me Dianën shkon pas në vitin 1983. Plant ishte vetëm 12 vjeçe kur e takoi princeshën, e cila po vizitonte një fabrikë xhenxhefili në Australi.

Në atë takim, Dianës i humbi një send i vogël prej balte. Plant u shkëput nga shokët e klasës, kaloi një barrikadë dhe arriti ta gjente objektin. Ajo e ruan këtë ngjarje si një kujtim të çmuar dhe thotë se pikërisht aty lindi lidhja e saj emocionale me princeshën.

Mbledhja e sendeve nisi në vitin 2014, pas këshillës së një miku për të shkuar në një ankand të shtëpisë Julien’s, ku ofroheshin për shitje gjashtë fustane të Dianës.

Sipas CNN, në atë periudhë Plant dhe bashkëshorti i saj, Livinio Stuyck, po shqyrtonin mundësinë për të investuar në një restorant picerie në Los Angeles. Pjesëmarrja në ankand u dha një drejtim tjetër planeve të tyre, duke i hapur rrugë një pasioni që do të vazhdonte për më shumë se një dekadë.

Sot, amerikania mendon se ka arritur të krijojë një prej koleksioneve private më të mëdha në botë me sende personale të Princeshës Diana. Për t’i financuar blerjet në ankande, ajo dhe bashkëshorti kanë ndërmarrë sakrifica të mëdha financiare, duke rifinancuar edhe hipotekën e shtëpisë së tyre.

Mes blerjeve të saj është një fustan i Atelier Versace, i veshur nga Diana, për të cilin Plant pagoi 200 mijë dollarë në vitin 2015.

Një vend të rëndësishëm në koleksion zë edhe krijimi me lule i stilistit Belville Sassoon, i quajtur “Fustani i Kujdesit”. Princesha e përdorte gjatë vizitave në spitalet e fëmijëve, ndërsa Plant e siguroi për 520 mijë dollarë.

Nga i njëjti ankand, koleksionuesja mori edhe 34 objekte të tjera. Mes tyre ishte një kapele me pupla struci që Diana e kishte mbajtur në muajin e mjaltit dhe që kushtoi 26 mijë dollarë. Shpenzimet e çiftit vetëm gjatë asaj dite arritën në rreth 1.9 milionë dollarë.

Por Plant nuk ka arritur të fitojë çdo objekt për të cilin ka konkurruar. Ajo tregon se në ankand nuk mundi të siguronte pulovrën e famshme të zezë me motive delesh, të veshur nga Diana në vitin 1981, e cila u shit për shumën rekord prej 1.14 milionë dollarësh.

Meqë princesha kishte pasur dy pulovra identike, Plant më vonë mundi të blinte të dytën.

Angazhimi i saj shtrihet edhe në bamirësi. Në vitin 2018, ajo themeloi Fondacionin “The Princess & The Platypus”, një organizatë jofitimprurëse që mbështet veprimtari bamirëse në frymën e kauzave humanitare të promovuara nga Diana gjatë jetës.

Tashmë, një pjesë e madhe e objekteve të mbledhura do të shfaqet në Bibliotekën dhe Muzeun Presidencial Ronald Reagan në Kaliforni, në ekspozitën “Princesha Diana: Dashuri, Jetë dhe Trashëgimi–Një Jetë Dhurimi”. Përmes saj synohet të tregohet rrugëtimi i Dianës, që nga fëmijëria e deri te vdekja tragjike në vitin 1997.

Publiku do të mund të shohë fustanin e nusërisë, veshje mbrëmjeje, letra personale dhe rroba të fëmijërisë së princeshës. Pjesë e prezantimit do të jenë gjithashtu magnetofonët që ajo përdorte për të regjistruar kujtimet me zë, krahas sendeve të tjera personale.

Për ekspozitën është huazuar edhe fustani i njohur prej kadifeje që Diana mbante në vitin 1985, kur kërceu me aktorin John Travolta në një darkë në Shtëpinë e Bardhë, gjatë presidencës së Ronald Reagan.

Një tjetër veshje me domethënie të veçantë është fustani i zi i krijuar nga stilisti Jacques Azagury, të cilin princesha nuk e veshi asnjëherë. Diana kishte kërkuar ndryshime në dizajn, por pas vdekjes së saj në gusht të vitit 1997, fustani mbeti i papërfunduar.

Plant vijon të kërkojë objekte për koleksionin, ndonëse pranon se mundësitë e saj financiare nuk ia lejojnë çdo blerje.

Më 5 dhjetor, shtëpia Sotheby’s në Nju Jork pritet të nxjerrë në ankand të famshmin “fustan të hakmarrjes”, një krijim i stilistes Christina Stambolian. Diana e kishte veshur në vitin 1994, pas deklaratave publike të Princit Charles për tradhtinë martesore.

Për këtë veshje parashikohet një çmim fillestar prej rreth 300 mijë dollarësh. Plant ka shprehur dëshirën për ta shtuar në koleksion, por thotë se aktualisht nuk i ka mjetet financiare për ta blerë.

Në këndvështrimin e saj, vlera e këtij koleksioni shkon përtej një investimi financiar: ai përfaqëson një mision personal për të bashkuar dhe ruajtur sa më shumë sende që dëshmojnë jetën dhe trashëgiminë e Princeshës Diana.