Ndahet nga jeta në moshën 93-vjeçare Tom Skerritt, protagonist i “Alien” dhe “Top Gun

Ka ndërruar jetë në moshën 93-vjeçare aktori amerikan Tom Skerritt, i njohur për interpretimet e tij në filmat “Alien” dhe “Top Gun”. Ai u bë i famshëm pikërisht falë këtyre roleve që lanë gjurmë në historinë e kinemasë.

Konfirmimin e lajmit e dha përfaqësuesi i tij për mediat në revistën “Variety”, duke sqaruar se vdekja erdhi si pasojë e shkaqeve natyrore.

Në një njoftim të shpërndarë nga familja për revistën “People”, Skerritt kujtohet jo vetëm për rrugëtimin e tij të gjatë dhe të suksesshëm në botën e aktrimit, por edhe për sensin e humorit, urtësinë, zemërgjerësinë dhe dashurinë që u dha atyre që e rrethonin.

Lajmi i hidhur ka prekur thellë kolegët e tij, të cilët kanë shprehur ngushëllime dhe kujtime përmes rrjeteve sociale. Julia Roberts, me të cilën Skerritt ndau ekranin në filmin “Steel Magnolias”, e kujtoi atë si “një dritë të ndritshme dhe një shpirt të butë”.

Edhe aktorja Cathy Baker, me të cilën ai luajti në serialin “Picket Fences”, u shpreh e pikëlluar për humbjen e një miku të shtrenjtë dhe një partneri të mrekullueshëm skenik. Ajo theksoi se kishte përfituar shumë nga eksperienca me të dhe se bashkëpunimi i tyre kishte qenë diçka e veçantë.
Më shumë se gjashtë dekada në ekran

Karriera e Tom Skerritt përshkoi mbi 60 vjet, gjatë së cilës ai mori pjesë në më shumë se 170 projekte kinematografike dhe televizive. Në këtë rrugëtim të gjatë, ai fitoi një çmim Emmy dhe mori nominime për Golden Globe dhe Screen Actors Guild.

Pas katër vitesh shërbim në Forcat Ajrore Amerikane, debutimi i tij në kinema erdhi në vitin 1962 me filmin e luftës “War Hunt”, ku pati mundësinë të luante përkrah Robert Redford dhe Sydney Pollack.

Një hap i rëndësishëm në karrierën e tij ndodhi në vitin 1970, kur mori pjesë në komedinë satirike “M*A*S*H” të regjisorit Robert Altman. Filmi pati një sukses të jashtëzakonshëm në kinema dhe u nominua për Oscar si filmi më i mirë.

Gjatë dekadës së 1970-ës, Skerritt u shfaq në një sërë titujsh të njohur, përfshirë “Harold and Maude”, “Thieves Like Us”, “Big Bad Mama” dhe “The Turning Point”.

Megjithatë, një ndër rolet e tij më të paharrueshëm mbetet ai i kapitenit Dallas në filmin fantastiko-shkencor “Alien” të Ridley Scott, i publikuar në vitin 1979. Kjo vepër u shndërrua në një klasik të zhanrit dhe vijon të renditet ndër produksionet më të vlerësuara ku ai mori pjesë.

Në vitin 1986, Skerritt interpretoi komandantin Mike “Viper” Metcalf në filmin “Top Gun”, përkrah Tom Cruise, duke fituar kështu një brez të ri fansash.

Në vitet 1990, ai u përfshi në filma si “A River Runs Through It”, “Contact”, “Poison Ivy” dhe “The Other Sister”. Një tjetër arritje e rëndësishme ishte roli në serialin “Picket Fences”, i cili i dha çmimin Emmy. Seriali u transmetua për katër sezone dhe u vlerësua për mënyrën si trajtonte çështjet familjare dhe sociale.

Edhe në vitet 2000, ai mbeti aktiv në film dhe televizion, duke marrë pjesë në projekte si “Tears of the Sun” dhe “Whiteout”, si dhe në serialet “Will & Grace”, “The West Wing” dhe “Brothers & Sisters”.

Përvoja e tij e fundit në kinema ishte në dramën western “Broke”, të vitit 2025, ku luajti përkrah Dennis Quaid.

Jashtë aktrimit, Skerritt u përfshi edhe në projekte sociale. Në vitin 2012, ai ishte bashkëthemelues i “Red Badge Project”, një nismë që ndihmonte veteranët ushtarakë të përballonin pasojat psikologjike të shërbimit përmes tregimit të historive të tyre personale.

Në një intervistë të vitit 2021, ai e cilësoi veten si një njeri me fat dhe nënvizoi se forca e vërtetë e një personi duket në mënyrën se si ai përballet me dobësitë e veta.

Me ndarjen e tij nga jeta, kinemaja amerikane humbet një figurë me një karrierë të pasur dhe të shumëanshme, i cili la gjurmë në disa prej filmave dhe serialeve më të dashura për disa breza shikuesish.