Mitch Winehouse humb betejën ligjore për sendet e Amyt, duhet t’u paguajë mbi 1 milion euro ish-shoqeve të saj të dhomës

Gjykata britanike ka vendosur kundër Mitch Winehouse në padinë që babai i së ndjerës Amy Winehouse ngriti ndaj Naomi Parry dhe Catriona Gourlay, dy ish-shoqe dhome të këngëtares. Sipas vendimit, ai duhet të mbulojë më shumë se 1 milion euro shpenzime ligjore.

Çështja lidhej me mbi 150 sende personale që artistja kishte lënë në apartamentin ku banonte me dy gratë. Mitch Winehouse pretendonte se Parry dhe Gourlay i kishin shitur këto objekte pa autorizim.

Dy të paditurat i kundërshtuan akuzat, duke thënë se sendet ua kishte falur vetë Amy Winehouse. Ato u shitën në ankande të organizuara në Shtetet e Bashkuara gjatë viteve 2021 dhe 2023, nga të cilat, sipas babait të këngëtares, të dyja kishin nxjerrë përfitime.

Amy Winehouse vdiq në vitin 2011 dhe pasuria e saj u trashëgua nga i ati. Në vitin 2021, Mitch Winehouse zhvilloi një ankand për bamirësi, ku dolën në shitje mbi 800 objekte personale të artistes. Nga ky ankand u siguruan rreth 4 milionë dollarë, shumë që iu dhurua Fondacionit Amy Winehouse.

Përfaqësuesit ligjorë të Mitch Winehouse deklaruan gjatë procesit se ai ishte vënë në dijeni për këto sende vetëm pasi ishte zhvilluar ankandi i familjes. Ata argumentuan gjithashtu se Naomi Parry dhe Catriona Gourlay kishin pasur si qëllim t’i mbanin të ardhurat e realizuara nga shitjet.

Gjyqtarja Clarke nuk e pranoi këtë version. Ajo arriti në përfundimin se Mitch Winehouse kishte ditur që në fillim se objektet do të shiteshin dhe e cilësoi padinë e tij si “të dobët në thelb”.

Në arsyetimin e vendimit, gjyqtarja kritikoi fort edhe mënyrën e ndjekjes së çështjes. Sipas saj, paditësi kishte vepruar “në mënyrë agresive dhe të pamëshirshme”, ndërsa akuzat e ngritura kishin cenuar reputacionin, karrierën, financat dhe shëndetin e dy grave.

Gjykata vuri në dukje edhe se Amy Winehouse ishte e njohur për bujarinë që tregonte ndaj miqve dhe njerëzve të saj të afërt. Ky fakt mbështeti qëndrimin e Naomi Parry dhe Catriona Gourlay se këngëtarja ua kishte dhuruar sendet.

Pas rrëzimit të padisë, Mitch Winehouse u urdhërua t’i paguajë përkohësisht Naomi Parry 569.330 paund shpenzime ligjore, ndërsa Catriona Gourlay duhet të marrë 394.521 paund.

Kostoja e përgjithshme e procedurës gjyqësore kalon 1.2 milionë paund, shumë që përllogaritet në më tepër se 1 milion euro.