“Lutje me zemër për Shqipërinë”/ Shkurte Fejza i kërkon Edi Ramës të dëgjojë studentët dhe t’u rikthejë shpresën

Këngëtarja e njohur Shkurte Fejza i ka përcjellë një mesazh publik kryeministrit Edi Rama, duke kërkuar nga institucionet dialog, mirëkuptim dhe një zgjidhje të drejtë për shqetësimet e studentëve.

Artistja e ka cilësuar reagimin e saj si një “lutje me zemër për Shqipërinë”. Ajo shprehet se po flet jo vetëm në cilësinë e këngëtares, por edhe si nënë, e shqetësuar që të rinjtë shqiptarë të kenë shpresë, dinjitet dhe besim te e ardhmja e vendit.

Fejza i është drejtuar drejtpërdrejt kreut të qeverisë me kërkesën për të gjetur një gjuhë të përbashkët dhe një zgjidhje të arsyeshme për situatën e krijuar.

Sipas saj, një marrëveshje do t’u sillte qetësi familjeve dhe do të parandalonte thellimin e ndarjeve mes qytetarëve dhe institucioneve shtetërore.

Këngëtarja ka vënë gjithashtu në dukje rolin e artit dhe të fjalës si mjete që bashkojnë njerëzit, duke e parë këtë moment si një mundësi për forcimin e bashkimit kombëtar.

Ajo ka shprehur respektin për institucionet dhe dashurinë e pakushtëzuar për popullin shqiptar, ndërsa është lutur që situata të përfundojë me një zgjidhje të dobishme për të gjithë.