Jon Bon Jovi i jep fund para kohe koncertit në New York për shkak të një shqetësimi shëndetësor

Një shfaqje e planifikuar e Jon Bon Jovit në Madison Square Garden të New York-ut u ndërpre papritur, pasi artisti nuk arriti ta çonte deri në fund performancën për arsye mjekësore.

Ikona 64-vjeçare e muzikës rock po zhvillonte të tetin koncert nga nëntë të parashikuarit në kuadër të turneut “Forever Tour”. Menjëherë pas interpretimit të këngës së famshme “Livin’ on a Prayer”, ai iu drejtua të pranishmëve për të kërkuar falje dhe për t’i njoftuar se nuk mund të vijonte më tej.

“Më falni, jam duke vuajtur dhe nuk ndihem aspak mirë. Ju lutem, mos i hidhni biletat. Do të gjejmë një mënyrë për ta riprogramuar shfaqjen. Për sonte më duhet të ndalem këtu”, u shpreh këngëtari drejtuar publikut, teksa u largua nga skena.

Zyrtarë të ekipit të tij njoftuan se koncerti zgjati afërsisht 90 minuta dhe se shkak për këtë vendim ishte një infeksion i sinuseve që po e shqetësonte artistin.

“Forever Tour” përkon me rikthimin e Bon Jovit në skenë pas ndërhyrjes kirurgjikale në kordat vokale të kryer në vitin 2022. Gjatë kohëve të fundit, ai ka folur hapur për vështirësitë shëndetësore, duke nënvizuar se nuk synon të ngjitet në skenë po qe se nuk arrin cilësinë që e ka karakterizuar përgjatë gjithë rrugëtimit të tij artistik.

Në një bashkëbisedim me “Sunday Times” gjatë vitit 2024, ai kishte deklaruar: “Në rast se zëri im nuk arrin më atë nivel të dikurshëm, atëherë për mua ka marrë fund”.

Sidoqoftë, në pohimet e tij më të freskëta për revistën “People”, ai kishte siguruar se ishte rimëkëmbur plotësisht nga operacioni, ndonëse e pranoi se periudha e rekuperimit kishte qenë më e gjatë nga ç’kishte parashikuar fillimisht.

Ende nuk dihet se kur do të mbahet koncerti i ricaktuar, teksa tifozët janë në pritje të një komunikate zyrtare nga ana e organizatorëve.