James Blunt kryeson sërish renditjen britanike pas 19 vitesh me “Airplane Mode

Pas 19 vitesh larg vendit të parë, këngëtari britanik James Blunt është rikthyer në krye të klasifikimit të albumeve në Mbretërinë e Bashkuar. Sipas të dhënave të Official Charts Company, albumi i tij i ri, “Airplane Mode”, e nisi rrugëtimin në këtë renditje në vendin e parë.

“Airplane Mode” është projekti i tetë solo i artistit 52-vjeçar dhe përfshin 12 këngë. Albumi doli të premten, më 13 nëntor, ndërsa Blunt po merrte vëmendje të madhe mediatike për pjesëmarrjen në reality show-n e BBC-së, “The Celebrity Traitors”.

Në spektakël, ai arriti mes tre finalistëve, por u eliminua nga dy konkurrentët e tjerë, Sebastian “Bass” Croft dhe Romesh Ranganathan. Blunt ka thënë se hyri në këtë format kryesisht për të promovuar muzikën e re, jo për ta fituar lojën.

Promovimi i albumit pati edhe një premtim me humor: këngëtari deklaroi se do ta ndryshonte zyrtarisht emrin në “Ryan Air” nëse “Airplane Mode” zinte vendin e parë. Emri ishte një referencë ndaj kompanisë ajrore Ryanair.

Albumi i fundit me të cilin Blunt kishte kryesuar renditjen britanike ishte “All The Lost Souls”, në vitin 2007. Më herët, ai kishte fituar famë ndërkombëtare me “Back To Bedlam”, të publikuar në vitin 2005, i cili qëndroi në krye të klasifikimit për dhjetë javë.

Kur u bë i ditur suksesi i albumit të ri, Blunt falënderoi fansat, duke shprehur mirënjohje për të gjithë ata që e kishin blerë, shkarkuar ose dëgjuar projektin.