Ingrit Gjoni sqaron raportin me Çiljeta Xhilagën: Ja pse e hoqi nga Instagrami

Këngëtarja Ingrit Gjoni ishte e ftuara e mbrëmjes së djeshme në emisionin “Live me Luizin”, ku foli edhe për marrëdhënien e saj me Çiljeta Xhilagën.

Gjatë intervistës, Luiz Ejlli e përfshiu këngëtaren në një lojë. Ai i përshkruante fotografi që Ingriti nuk i shihte, ndërsa ajo duhej të kuptonte se për cilin person dhe çfarë situate bëhej fjalë.

Kur në lojë u shfaq fotografia e Çiljetës, Luizi e pyeti Gjonin nëse miqësia mes tyre i kishte qëndruar kohës.

Ingrit Gjoni u shpreh se raporti vazhdon, megjithëse ka pasur disa ndryshime të vogla. Ajo tha se Çiljeta ka krijuar miqësi më të afërta në jetën e saj dhe se, ndonëse mbetet shoqe zemre, tashmë pushimet nuk i kalojnë bashkë, pasi këngëtarja i bën ato me shoqe të tjera.

Ejlli e riktheu bisedën edhe te perceptimi i dikurshëm, sipas të cilit dy këngëtaret shiheshin nga e gjithë Shqipëria si rivale.

Gjoni shpjegoi se në fillimet e tyre ato ishin konkurrente. Sipas saj, kur ajo këndonte në një klub, Çiljeta do të performonte domosdoshmërisht në klubin tjetër të nesërmen, çka i bëri njerëzit t’i konsideronin rivale.

E pyetur për arsyen pse nuk ndiqen më në “Instagram”, këngëtarja e trajtoi me humor situatën dhe tregoi se ishte ajo që e kishte hequr Çiljetën nga rrjeti social.

Ajo sqaroi se vetëm pardje kishin qenë bashkë për darkë, por vendosi ta hiqte nga “Instagrami” pasi Çiljeta nuk zgjodhi të shkonte me të me pushime. Ingriti shtoi se ishte mërzitur shumë, ndërsa Çiljeta nuk e ka hequr atë dhe i thotë: “Më bëj se le nam”.