Heidi Baci në “Tech Talk”: Pandemia i ndërpreu studimet për farmaci, ndërsa fama i erdhi krejt papritur

Emisioni i ri “Tech Talk”, i moderuar nga Kristi Gongo dhe Kushtrim Shala, u shfaq për herë të parë këtë të martë në ekranin e Top Channel.

E ftuara e puntatës së parë ishte Heidi Baci, moderatorja e “Për’puthen” dhe ish-finalistja e BBVA 3. Gjatë bisedës, ajo tregoi për rrugëtimin e saj, duke nisur nga pasioni për farmaceutikën deri te njohja publike, e cila sipas saj erdhi në mënyrë të papritur.

Baci rrëfeu se kishte zgjedhur fushën e mjekësisë, veçanërisht farmaceutikën, por planet e saj ndryshuan pas shpërthimit të pandemisë globale të COVID-19 në vitin 2021. Në atë periudhë, ajo kishte përfunduar trevjeçarin e parë të studimeve.

“Kisha dëshirë të ndiqja farmaceutikën, por jeta më drejtoi në një tjetër rrugë. Problemi global i COVID-it ndodhi pikërisht pasi mbylla trevjeçarin e parë, ndaj nuk arrita të përfundoja specializimin që doja në farmaceutikë. Megjithatë, mund të bëheshe biologe, të studioje kiminë dhe analizat. Madje kisha mësuar edhe si të hapja e të mbyllja leprovetën me një dorë, sepse ishte pjesë e testit. Vendosa të mos e vazhdoja më, pasi në Itali do të merresha me kryerjen e testeve në një periudhë shumë të vështirë për shtetin dhe njerëzit. Në atë kohë nuk mund të hyje askund pa bërë testin e COVID-it”, u shpreh ajo.

Gjatë emisionit, Heidi foli edhe për raportin që ka krijuar me ndjekësit e saj në rrjetet sociale. Ajo deklaroi se u është mirënjohëse, pasi beson se mbështetja e tyre ka ndikuar drejtpërdrejt në ndërtimin e karrierës së saj.

“Ata janë shumë të lidhur me mua. Kur mendoj për këtë marrëdhënie, kuptoj se nuk e di se ku do të isha pa ta. Ndjekësit kanë qenë forca ime më e madhe dhe unë e shijoj shumë raportin që kemi. E kam vendosur veten në një situatë ku flitet për mua, ndaj nuk më shqetëson as kritika. Nëse do ta vendosja në peshore, dashuria e audiencës sime do të fitonte gjithmonë. Prandaj nuk e kam problem edhe kur kritikohem, sepse ata, praktikisht, më ndërtuan një karrierë”, përfundoi Baci.