Fqinjët kundërshtojnë projektin për vilën e Taylor Swift dhe Travis Kelce në Ohio: «Kafshët kanë nevojë për vende ku të çiftëzohen

Ndryshimet e planifikuara në pronën luksoze të Taylor Swift dhe bashkëshortit të saj, Travis Kelce, në Ohio, kanë ndarë banorët e zonës. Disa kundërshtuan vendosjen e shkurreve të larta rreth vilës, duke ngritur shqetësimin se ndërhyrjet mund të dëmtojnë faunën dhe habitatin e kafshëve.

Pas shqyrtimit të projektit të rishikuar për hapësirat e jashtme, çifti mori miratimin për ta realizuar atë.

Rreth 35 persona morën pjesë të martën në mbledhjen e Bordit Lokal të Rishikimit Arkitekturor, mbajtur në qendrën komunitare të Bratenahl, Ohio. Diskutimi u përqendrua ndër të tjera te shkurret, të cilat do të jenë rreth 3 metra të larta dhe synojnë të ofrojnë më shumë privatësi për pronën.

Banorja Lucy Weller tha se projekti nuk u kushton vëmendjen e duhur specieve vendase dhe nevojave të kafshëve.

“Kjo është një mundësi e shkëlqyer që njerëzit me para të investojnë për ta sjellë këtë shtëpi në nivelin që meriton. Do të ishte gjithashtu rast i mirë që kjo palë të kthehej dhe të mësonte më tepër për speciet vendase dhe për projektimin e hapësirave që marrin parasysh nevojat e kafshëve të zonës”, deklaroi Weller.

Ajo kritikoi veçanërisht hapësirat e mbuluara me bar dhe, sipas saj, mungesën e elementeve që do ta ndihmonin faunën.

“Kafshëve nuk u duhen lëndina, por ushqim, strehë dhe vende ku të çiftëzohen. Nuk mendoj se ky projekt peizazhi po bën diçka për mbrojtjen e jetës së egër”, tha banorja.

Kundërshtim shprehu edhe Chuck Bauernschmidt, i cili tregoi se jeton dy shtëpi larg çiftit.

“Më vjen keq për komunitetin tonë. Kjo nuk do të jetë e hapur. Këtu ka një pyll dhe nuk e kuptoj pse bordi po ecën në këtë drejtim. A po veproni në kundërshtim me rregulloret? Mos ndoshta gaboj? Nuk besoj se gaboj”, u shpreh ai.

Swift dhe Kelce nuk morën pjesë në mbledhje. Në vend të tyre, për interesat e çiftit folën administratori i pronës, Patrick Hyland, arkitekti Derek Kuryla dhe menaxheri i projektit, Jacob Kutz.

Vasiliki Diamantis, nga ana tjetër, mbështeti zgjedhjen e Bratenahl si vendbanim nga çifti dhe u kërkoi fqinjëve t’i mirëprisnin.

“Duhet ta konsiderojmë privilegj që këta njerëz, të cilët kanë mundësi financiare, e zgjodhën këtë vend për banesën e tyre. Në vend që të debatojmë për peizazhin dhe privatësinë, le të bashkohemi si komunitet dhe ta shohim si një mundësi. Është bukur që zgjodhën Bratenahl, sepse është një vend i veçantë”, deklaroi Diamantis.

Një pjesëmarrës tjetër e quajti debatin “budallallëk” dhe parashikoi se prona do të shitet pas shtatë apo dhjetë vitesh, kur çifti të divorcohet. Të pranishmit reaguan me protesta dhe vërshëllima ndaj komentit të tij.

Bordi e miratoi njëzëri planin e rishikuar. Ai parashikon vendosjen e shkurreve rreth 3 metra të larta dhe përditësime në punimet me tulla të pronës.

Çifti kishte marrë më herët, në shtator, lejen për të ndërtuar një gardh privatësie rreth 1.8 metra të lartë. Edhe ai vendim ishte kundërshtuar nga disa banorë.

Këngëtarja, fituese e 14 çmimeve Grammy, dhe Travis Kelce, ylli i Kansas City Chiefs, u martuan në korrik. Në mars, ata blenë rezidencën luksoze në Ohio për 5.35 milionë dollarë. Ajo ka tetë dhoma gjumi dhe 11 banjo. Sipas një raportimi ekskluziv të Page Six në shtator, çifti kishte shtuar masat e sigurisë për mbrojtjen e banesës.

Megjithatë, sipas burimeve të cituara nga mediat, vila nuk është planifikuar të shërbejë si vendbanimi kryesor i çiftit. Swift zotëron gjithashtu prona në Rhode Island, Beverly Hills, Nashville dhe New York.