Fjoralba Ponari ironizon Ramën: Akuzat ndaj Ballukut shkojnë deri në 1 miliard euro, ndërsa propozohen taksa të reja

Moderatorja dhe influencerja Fjoralba Ponari ka reaguar në rrjetet sociale për akuzat ndaj ish-zëvendëskryeministres Belinda Balluku, si edhe për paketën e re fiskale të propozuar nga qeveria e Edi Ramës.

Në një videomesazh, ajo u ndal te shifra prej 1 miliard eurosh, e përmendur në kuadër të akuzave për abuzime me tenderat ndaj Ballukut. Për të ilustruar përmasat e kësaj shume, Ponari bëri një përllogaritje lidhur me mënyrën se si do të mund të shpenzohej ajo.

Duke iu referuar deklaratës së Lalës për ish-numrin dy të qeverisë, e cila akuzohet për abuzime me tendera deri në vlerën e 1 miliard eurove, Ponari theksoi se kjo shifër përfaqësohet nga njëshi me nëntë zero pas tij. Sipas llogaritjes së saj, një personi do t’i duheshin 55 vite për ta shpenzuar këtë shumë, nëse çdo ditë do të përdorte 50 mijë euro, pa bërë asgjë tjetër dhe pa i shtuar pasurisë së vet as edhe një cent. Ajo nënvizoi se gjatë gjithë këtyre 55 viteve, shpenzimi ditor do të duhej të ishte 50 mijë euro, duke e mbyllur reagimin me shprehjen: “Ejj…”.

Ponari kritikoi gjithashtu paketën e re fiskale të qeverisë, duke kundërshtuar çdo masë që do të rriste barrën e taksave për qytetarët.

Ajo e shoqëroi qëndrimin e saj me akuzën se propozimet për taksa të tjera po bëhen “me pafytyrësinë më të madhe”.

Ndër ndryshimet e parashikuara në paketën fiskale përfshihet edhe taksimi i influencerave, një kategori që mund të preket nga masat e reja.

Nisma ka shkaktuar reagime në rrjetet sociale, ndërsa disa kritikë e lidhin atë me klimën e tensionuar politike dhe protestat kundër qeverisë.