Dua Lipa shfaqet papritur në një dasmë familjare në Pejë

Këngëtarja me famë ndërkombëtare, Dua Lipa, ka vizituar në mënyrë të papritur Pejën, ku ka marrë pjesë në një dasmë familjare dhe ka kaluar kohë me të afërmit e saj.

Prania e artistes në ceremoninë private nuk kaloi pa u vënë re nga të ftuarit. Momente nga festa u publikuan edhe në rrjetet sociale, ndërsa Dua gjeti mundësinë të ishte pjesë e gëzimit familjar, pavarësisht angazhimeve të saj të shumta profesionale.

Kjo vizitë vjen në një vit të rëndësishëm për këngëtaren, e cila ka qenë në vëmendje edhe për jetën personale. Dua Lipa dhe aktori britanik Callum Turner kurorëzuan martesën në një ceremoni private në Londër në maj, ndërsa më vonë vijuan festimet martesore në Sicili.

Lidhja e Duas me Kosovën dhe prejardhjen e saj shqiptare është e njohur. Prindërit e saj, Dukagjin dhe Anesa Lipa, janë nga Kosova, ndërsa familja ka vazhduar ta ruajë afërsinë me vendin edhe pas suksesit të madh ndërkombëtar të artistes.

Në intervista të ndryshme, ajo ka vënë në pah rolin e familjes dhe të traditave në jetën e saj, duke theksuar se festat dhe çastet e përbashkëta kanë pasur gjithmonë një rëndësi të veçantë për të.

Këtë herë, këngëtarja zgjodhi të largohej për pak nga skenat dhe aktivitetet e mëdha ndërkombëtare, duke e bërë pjesëmarrjen e saj në dasmën e Pejës një surprizë për të pranishmit./TAR