Dua Lipa feston 31-vjetorin, nëna e saj ndan foton e papublikuar më parë nga dasma dhe i bën urimin e veçantë

Këngëtarja me origjinë shqiptare Dua Lipa ka festuar sot 31-vjetorin e lindjes, disa muaj pas martesës së saj me aktorin britanik Callum Turner.

dua lipa me nene e saj

Mes urimeve të shumta që ka marrë, vëmendje ka tërhequr urimi i nënës së saj, Anesa Lipa, e cila ka zgjedhur ta urojë të bijën duke publikuar një fotografi të papublikuar më parë nga festimet e dasmës së saj në Siçili.

Në fotografi, Dua Lipa shfaqet e veshur me një fustan të shkurtër argjendi me shkëlqim, çizme deri te gjuri dhe një vello nusërie, ndërsa në duar mban një buqetë me lule të bardha. Pranë saj pozon Anesa Lipa, e veshur me një fustan të zi të shkurtër dhe çizme të zeza.

Nëna e Dua Lipës e ka shoqëruar foton me një mesazh të ndjerë për vajzën e saj, duke shprehur krenarinë për njeriun që është bërë dhe për gjithçka që ka arritur.

“Jam kaq krenare për atë që je dhe për gjithçka që ke arritur të bëhesh. Uroj që jeta të të kthejë gjithë dashurinë, mirësinë dhe lumturinë që ti dhuron”, shkroi Anesa.

Ajo i uroi së bijës një kapitull të ri plot momente të paharrueshme dhe arsye për të buzëqeshur, duke e mbyllur mesazhin në gjuhën shqipe; “Të dua pafund”.