Diddy kërkon lirinë me çdo kusht, i gatshëm të paguajë miliona si garanci

Reperi i famshëm Sean “Diddy” Combs ka paraqitur një apel të tretë për t’u liruar nga paraburgimi, duke ofruar si garanci deri në 50 milionë dollarë.

Apeli sfidon vendimin e Gjykatës së Distriktit të Jugut të Nju Jorkut, e cila dy herë e ka refuzuar kërkesën për lirim me kusht. Ekipi ligjor i Combs argumenton se provat kundër tij janë të pamjaftueshme dhe se vendimi i gjykatës për ta mbajtur atë në paraburgim është marrë me gabime ligjore.

Diddy u arrestua muajin e kaluar me akuza të rënda për shantazh, trafikim seksual dhe mashtrim, por ai është deklaruar i pafajshëm dhe vazhdon të qëndrojë në paraburgim në Brooklyn. Prokurorët kanë kundërshtuar lirimin e tij, duke pretenduar se ai mund të frikësojë dëshmitarët dhe të pengojë procesin, për shkak të pasurisë dhe aksesit të tij në avionë privatë.

Për të siguruar lirimin, Combs ka ofruar shtëpinë e tij në Miami dhe shtëpinë e nënës si kolateral, dhe është zotuar të kufizojë lëvizjet në Nju Jork dhe Miami. Ai gjithashtu ka premtuar se do të mbajë një monitor GPS dhe të shesë avionin e tij privat. Mbrojtja e tij argumenton se prokurorët nuk kanë prova të forta që Combs përbën një rrezik për komunitetin apo se ka ndërhyrë në dëshmitarë.