Bereta që u bë simbol: Travolta tregon historinë pas look-ut të tij në Festivalin e Filmit

John Travolta ka zbuluar arsyen pas paraqitjes së tij virale me beretë në Festivalin e Filmit në Cannes 2026, duke thënë se zgjedhja e tij ishte një homazh për regjisorët e “vjetër të Hollywood-it”.

Aktori dhe regjisori 72-vjeçar, i cili bëri debutimin e tij si regjisor me filmin Propeller One-Way Night Coach, tregoi në një intervistë për CNN se ideja e beretës erdhi si pjesë e rolit që ai donte të mishëronte gjatë festivalit. “Regjisorët e vjetër mbanin bereta dhe syze. Mendova, kjo është ajo që do të bëj edhe unë,” u shpreh Travolta.
Ai u shfaq disa herë gjatë festivalit me bereta të ndryshme, duke përfshirë një paraqitje gjatë mbërritjes në Cannes, një tjetër në tapetin e kuq dhe një në fotot zyrtare të filmit. Sipas tij, çdo detaj ishte menduar për të krijuar një kujtim të veçantë të këtij momenti në karrierën e tij.

Travolta gjithashtu udhëtoi vetë me avion drejt festivalit së bashku me vajzën e tij, Ella Bleu Travolta, e cila luan në film, duke e bërë këtë eksperiencë edhe më personale dhe emocionale.

Filmi, i bazuar në librin e tij të vitit 1997, pritet të publikohet globalisht më 29 maj në Apple TV. Travolta u shpreh se ky projekt dhe çmimi nderi që mori në Cannes janë ndër momentet më të rëndësishme të karrierës së tij, duke i quajtur “artistikisht dhe emocionalisht të paharrueshme”.