Ankandi i sendeve të Brigitte Bardot mbledh afro 1 milion euro, shumëfish mbi parashikimet

Afro 1 milion euro u arkëtuan nga shitja në ankand e sendeve personale të aktores së njohur franceze Brigitte Bardot. Sipas shtëpisë së ankandeve Millon, shuma e arritur ishte rreth 20 herë më e lartë se vlerësimi fillestar.

Brigitte Bardot ndërroi jetë në dhjetor, në moshën 91-vjeçare. Të ardhurat do të përdoren nga Fondacioni Brigitte Bardot për mbrojtjen e kafshëve, ndërsa një pjesë e tyre do t’i kalojë djalit të aktores, Nicolas-Jacques Charrier.

Shitja u zhvillua të hënën, më 21 shtator, me 285 objekte që kishin qenë në shtëpitë e Bardot në Paris dhe Saint-Tropez. Koleksioni përfshinte kapele kashte, syze dielli, veshje, enë tavoline dhe mobilje. Sipas Agjencisë Franceze të Lajmeve (AFP), në ankand morën pjesë rreth 3,000 ofertues nga Franca dhe vende të tjera.

Alexandre Millon, ankandisti i eventit, e cilësoi rezultatin si të jashtëzakonshëm, veçanërisht për shkak të hendekut të madh mes pritshmërive fillestare dhe vlerës së shitjeve.

“Brigitte Bardot vërtetoi edhe një herë se është një alkimiste e jashtëzakonshme, ajo i shndërroi vlerësimet prej rreth 50,000 eurosh në pothuajse 1 milion euro, duke përfshirë komisionet”, deklaroi Millon.

Ndër objektet e nxjerra në shitje ishin edhe dy qafore qensh të pajisura me emrin e Bardot. Të vlerësuara fillimisht vetëm me 30 euro, ato u blenë për 9,400 euro nga një ofertues rus.

Një portret i aktores arriti çmimin prej gati 40,000 eurosh. Makina e shkrimit me të cilën Bardot kishte shkruar autobiografinë e saj u shit për 4,634 euro. Ndërkohë, dy kitara u blenë përkatësisht për 8,600 dhe 1,900 euro, ndërsa tre lodra prej pelushi u shitën për gjithsej 2,200 euro.

Ghislaine Calmels, CEO e Fondacionit Brigitte Bardot, tha se ankandi ishte i lidhur me një nismë të ngjashme të ndërmarrë nga aktorja në vitin 1987.

“Kjo shitje është një vazhdim i asaj që ajo organizoi në vitin 1987. Sot, lufta e saj vazhdon”, u shpreh Calmels pas përfundimit të ankandit.

Shitja e sendeve personale shkaktoi kundërshtimin e bashkëshortit të fundit të aktores, Bernard d’Ormal. Ai e kritikoi vendimin për nxjerrjen në ankand të objekteve që i përkisnin Bardot.

“Janë sende personale. Është mungesë respekti ndaj kujtimit të Brigitte. Sendet e saj duhet të ishin ruajtur si pjesë e trashëgimisë së saj”, deklaroi ai për AFP dy ditë para zhvillimit të ankandit.

D’Ormal shtoi se Brigitte Bardot, sipas tij, nuk do ta kishte miratuar shitjen e sendeve të saj personale.

Fondacioni Brigitte Bardot i hodhi poshtë deklaratat e tij, duke bërë të ditur se ankandi ishte miratuar nga bordi i drejtorëve në qershor. Në atë periudhë, Bernard d’Ormal ishte ende president i fondacionit.

Bashkëshorti i fundit i aktores tha se nuk e kishte kuptuar se në ankand do të përfshihej një numër kaq i madh sendesh private. Polemika u shfaq disa ditë pasi ai u largua nga drejtimi i Fondacionit Brigitte Bardot, detyrë që e kishte mbajtur që prej vdekjes së aktores.