Aktori turk İbrahim Çelikkol përfundon në polici!

Një zhvillim i papritur ka tronditur sot mediat turke, duke vendosur në qendër të vëmendjes disa nga figurat më të njohura të televizionit dhe muzikës. Në orët e para të mëngjesit, autoritetet kanë zhvilluar një operacion të gjerë policor, i cili ka përfunduar me ndalimin e disa personazheve të famshëm.

Ky aksion ka shkaktuar reagime të menjëhershme në opinionin publik dhe është kthyer në lajmin kryesor të ditës në Turqi.

Sipas burimeve zyrtare, operacioni është pjesë e një hetimi të thelluar që po zhvillohet nga autoritetet. Të ndaluarit dyshohen për përfshirje në përdorimin e lëndëve të ndaluara, çka ka çuar në ndërhyrjen e policisë dhe shoqërimin e tyre për procedura të mëtejshme.

Forcat e rendit kanë vepruar që në orët e para të ditës, duke shoqëruar të dyshuarit dhe duke nisur menjëherë procesin hetimor.

Në listën e personave të ndaluar figurojnë nëntë emra të njohur të showbiz-it turk. Ndër ta spikat aktori İbrahim Çelikkol, i cili gëzon një popullaritet të madh edhe në Shqipëri falë roleve të tij në serialet turke. Bashkë me të, në këtë operacion janë përfshirë edhe artistë të njohur të muzikës si Simge Sağın, Melek Mosso, Mustafa Ceceli, Bengü, Ersay Üner, Deha Bilimler, Aslı Sipahi Hacısüleymanoğlu dhe İlkay Şencan.

Burime pranë hetimit bëjnë me dije se të gjithë të ndaluarit do të dërgohen në Institutin e Mjekësisë Ligjore, ku do t’i nënshtrohen analizave specifike, përfshirë testin e fijeve të flokut. Ky test do të shërbejë për të përcaktuar në mënyrë shkencore nëse ata kanë konsumuar substancat për të cilat dyshohen. Vetëm pas përfundimit të këtyre ekzaminimeve, personazhet e njohur do të merren në pyetje për të dhënë dëshmitë e tyre zyrtare.