Aktori Klodian Hoxha zbulon prapaskenat e rolit në një serial serb

Klodian Hoxha, aktori shqiptar, i është bashkuar trupës së një seriali që do të shfaqet në televizionin shtetëror të Serbisë.

I ftuar në emisionin “Në Shtëpinë Tonë” në Top Channel, ai tregoi detaje nga prapaskenat e përfshirjes së tij në projekt. Hoxha rrëfeu se një agjent i hapi rrugën përtej kufijve. Fillimisht, ai kishte kryer një audicion për një personazh tjetër, por e refuzoi sepse kërkonte të fliste serbisht. Më pas, i erdhi një propozim për një rol që kërkonte shqip, anglisht dhe gjermanisht. “Unë interpretoj një bos që banon në Beograd,” u shpreh aktori, pa dashur të japë më shumë hollësi.

Gjithashtu, ai paralajmëroi një projekt të rëndësishëm personal që së shpejti do ta çojë në festivalin e Kanës. “Po synojmë të realizojmë diçka tonën nga ana produksioni, një film shqiptar ku unë do të jem edhe producent,” shtoi Hoxha.

Klodian Hoxha është një figurë e njohur e skenës, me një karrierë të ndërtuar si në teatër ashtu edhe në kinemanë vendase e ndërkombëtare. I diplomuar në Akademinë e Arteve në Tiranë, ai e sheh veten së shpejti në rolin e producentit të filmit.