ZNAM dënon ashpër çdo përpjekje për të lavdëruar krimet dhe kriminelët e luftës

Lëvizja ZNAM për Maqedoninë Tonë ka shprehur një qëndrim të prerë kundër krimeve të luftës të ndodhura në territorin e ish-Jugosllavisë, duke përfshirë edhe çështjet e Hagës që lidhen me Maqedoninë gjatë vitit 2001. Ata dënojnë fuqishëm çdo orvatje për të lavdëruar, zbutur apo arsyetuar këto akte.

Sipas ZNAM-it, nuk mund të ketë standarde të dyfishta kur bëhet fjalë për nderimin e viktimave, respektimin e së drejtës ndërkombëtare dhe vlerave të qytetërimit. Ata theksojnë se asnjë krim lufte nuk mund të justifikohet dhe asnjë i dënuar me vendim gjyqësor të formës së prerë nuk mund të ngrihet si model për t’u respektuar apo admiruar. Gjithashtu, ZNAM sqaron se postimi në fjalë përfaqëson një pikëpamje personale të drejtorit të Agjencisë për Realizimin e të Drejtave të Komuniteteve dhe nuk pasqyron qëndrimin e Qeverisë apo të bartësve të pushtetit. Përgjegjësia për veprimet dhe qëndrimet publike duhet të merret si në plan individual, ashtu edhe institucional. Prandaj, ata e konsiderojnë të pabazë dhe politikisht të pandershme pretendimin se ZNAM “po hesht”, thjesht sepse nuk kanë reaguar sipas një afati të diktuar nga opozita.

Nga partia rikonfirmojnë se ZNAM vepron dhe komunikon gjithmonë duke u mbështetur në parimet e veta themelore.

“Nëse me të vërtetë duam një bisedë serioze mbi vlerat evropiane, demokracinë, ballafaqimin me të shkuarën dhe respektimin e normave ndërkombëtare, atëherë kjo duhet të bëhet pa etiketime, pa pamflete politike dhe pa konstruksione historike të sajuara për politikën e momentit. ZNAM dënon çdo glorifikim të krimeve dhe kriminelëve të luftës. Në të njëjtën kohë, ZNAM hedh poshtë edhe instrumentalizimin politik të kësaj çështjeje tejet serioze, që ka për qëllim krijimin e fajësisë kolektive, ndarjeve etnike dhe konstruksioneve politike. Venko Filipçe dhe LSDM-ja po e shndërrojnë një temë të rëndësishme në një konstruksion të gjerë politik, duke u përpjekur të lidhin partitë në pushtet dhe Lëvizjen ZNAM me Serbinë, Aleksandar Vuçiqin, “botën serbe”, Kinën, Rusinë dhe KPM-në. Për ne, kjo është një teknikë klasike e manipulimit politik, e cila synon të kthejë një veprim konkret në një narracion më të gjerë për të diskredituar gjithë Qeverinë dhe aleatët e saj të koalicionit. Njëkohësisht, si një Lëvizje dhe subjekt serioz politik, ne nuk do të lejojmë që të ashtuquajturit ‘interpretues’ politikë të na tregojnë se çfarë mendojmë, në çfarë besojmë dhe për çfarë angazhohemi. Qëndrimi i ZNAM-it është i qartë: e ardhmja e Maqedonisë është në NATO dhe në Bashkimin Evropian! ZNAM do të vazhdojë ta mbajë përgjegjësinë ndaj Maqedonisë me një qëndrim të pavarur, parime të qarta dhe respekt ndaj shtetësisë, të drejtës ndërkombëtare dhe të gjithë qytetarëve të saj”, thuhet në deklaratën e tyre.