VLEN përgëzon Koalicionin Shqiptar dhe mirëpret ndryshimin politik në Serbi

VLEN i ka përcjellë urimet Koalicionit Shqiptar për rezultatin e siguruar në zgjedhjet parlamentare në Serbi.

Sipas VLEN-it, ky rezultat tregon se shqiptarët mund të arrijnë më shumë kur bashkohen përreth interesave të përbashkëta.

Subjekti mirëpret ndryshimin politik në Serbi dhe fitoren e Listës Studentore. Ai shpreh pritjen që qeveria e re të krijohet sa më parë, të garantojë respektimin e të drejtave të shqiptarëve të Luginës dhe t’i japë fund diskriminimit sistematik, përfshirë pasivizimin e adresave. VLEN thotë se, me Vuçiqin në opozitë, duhet të përfundojë represioni shtetëror ndaj shqiptarëve të Luginës së Preshevës.

Ndryshimi në Beograd, sipas VLEN-it, duhet të shërbejë edhe për hapjen e një kapitulli të ri në raportet mes vendeve të rajonit dhe për forcimin e bashkëpunimit në kuadër të Procesit të Berlinit, me synim integrimin në Bashkimin Evropian.

VLEN shpreson që qeveria e re e Serbisë të ketë vullnetin dhe vendosmërinë politike për të ndërtuar dialog e bashkëpunim me Republikën e Kosovës. Ky proces duhet të zhvillohet mes palësh të barabarta dhe të përfundojë me njohjen reciproke të dy shteteve të pavarura.