VLEN: Pas 35 vitesh, provimi i jurisprudencës do të mund të jepet edhe në shqip

Afan Elezi i VLEN-it bëri të ditur sot, gjatë një konference për media, se studentët shqiptarë do të mund ta japin provimin e jurisprudencës edhe në gjuhën shqipe. Sipas tij, kjo mundësi vjen pas 35 vjetësh nga pavarësimi i shtetit dhe 58 vjetësh nga miratimi i ligjit të parë për këtë provim.

Elezi e cilësoi vendimin të rëndësishëm për brezat e juristëve shqiptarë dhe tha se çështjet e pazgjidhura prej dekadash mund të marrin zgjidhje kur ekzistojnë vullneti dhe përgjegjësia politike.

Ai kujtoi se studentët shqiptarë i kanë ndjekur studimet në shqip, por për provimin e jurisprudencës u është dashur të përdorin maqedonishten. Sipas Elezit, kjo pengesë është përsëritur për breza të tërë, ndërsa qeveritë e mëparshme nuk e zgjidhën.

Elezi iu drejtua edhe Arbër Ademit, të cilin e quajti protagonistin kryesor të opozitës, duke e pyetur në çfarë gjuhe e kishte dhënë provimin e jurisprudencës në vitin 2016. Ai shtroi pyetjen nëse Ademi, si jurist shqiptar, ishte detyruar ta jepte provimin në maqedonisht dhe, nëse po, me çfarë të drejte fliste tani për patriotizëm e mbante leksione për gjuhën shqipe, ndonëse gjatë pushtetit të tij kishte drejtuar tetë herë Ministrinë e Drejtësisë.

Sipas Elezit, nuk mund të kërkohet besimi i shqiptarëve duke u paraqitur si mbrojtës i të drejtave të tyre, pasi të kesh pasur mundësi institucionale t’i çosh ato përpara dhe të mos e bësh. Ai tha se qytetarët presin zbatimin e të drejtave përmes vendimeve konkrete dhe jo vetëm deklarata e fjalime.

Ai shtoi se nuk kanë marrë pushtetin për të përsëritur arsyetimet e qeverive të kaluara, por për të zgjidhur problemet e lëna prej tyre.

Provimi i jurisprudencës në shqip është një nga këto çështje dhe, sipas Elezit, nuk do të jetë e fundit që do të zgjidhet. Ai uroi studentët shqiptarë, duke theksuar se kjo e drejtë u përket dhe tashmë ka nisur rrugën drejt realizimit.