VLEN: Drejt realizimit zotimi për përfshirjen e 600 specializantëve në shëndetësinë publike

Premtimi për angazhimin e 600 specializantëve privatë në sektorin publik të shëndetësisë po konkretizohet, deklaroi deputetja e VLEN-it, Kaltrina Beqiri, pasi Qeveria vendosi të punësojë edhe grupin e dytë me 300 mjekë të rinj.

Gjatë një konference për media, Beqiri bëri të ditur se 300 specializantët e grupit të parë tashmë janë integruar në sistemin shëndetësor publik. Sipas saj, procedura për përfshirjen e 300 të tjerëve pritet të mbyllet deri në fund të këtij viti.

Beqiri e cilësoi këtë vendim si një zhvillim me rëndësi për 300 mjekët e rinj, të cilët e kanë filluar specializimin duke i mbuluar vetë shpenzimet, ndërsa tani do të angazhohen në shëndetësinë publike.

Ajo theksoi se nga ky proces do të përfitojnë gjithashtu spitalet që prej vitesh përballen me mungesë specialistësh. Prioritet do të kenë spitalet e përgjithshme dhe klinike jashtë Shkupit, si edhe disiplinat mjekësore ku nevoja për kuadër është më e madhe.

Sipas deputetes së VLEN-it, përfshirja e mjekëve të rinj ka rëndësi të veçantë për banorët e Tetovës, Gostivarit, Kërçovës, Strugës dhe komunave të tjera, të cilët shpesh duhet të udhëtojnë në Shkup për të marrë shërbime specialistike.

Beqiri nënvizoi se, përveç përmirësimit të infrastrukturës shëndetësore, forcimi i kapaciteteve njerëzore vazhdon të mbetet përparësi. Në këtë kuadër, ajo përmendi investimin prej 74 milionë eurosh në Spitalin Klinik të Tetovës dhe hapjen e rrugës për ndërtimin e spitalit të ri në Kërçovë.

Deputetja deklaroi se spitaleve nuk u mjaftojnë vetëm objektet dhe aparaturat, pasi ato kanë nevojë edhe për mjekë, duke shtuar se VLEN-i po e realizon zotimin e dhënë për punësimin e 600 specializantëve.