Tre të arrestuar në Tetovë pas të shtënave me armë automatike drejt një banese

Policia e Tetovës ka vënë në pranga tre individë dhe ka konfiskuar municione e pajisje të ndryshme, nën dyshimin se qëlluan me armë zjarri mbi një shtëpi në qytet.

Sipas njoftimit zyrtar, më 10 gusht 2026, rreth orës 14:45, forcat e rendit të SPB Tetovë arrestuan shtetasin A.Xh., 34 vjeç, banues në fshatin Sellcë. Ai akuzohet për kryerjen e veprës penale të “shkaktimit të rrezikut të përgjithshëm”, pasi dyshohet se dy ditë më parë, më 8 gusht 2026, në orët e para të mëngjesit rreth orës 04:20, ka lëshuar disa të shtëna me pushkë automatike nga një motoçikletë në drejtim të shtëpisë së Sh.B., 48 vjeç, dhe më pas është larguar me shpejtësi.

Në vijim të hetimeve, po atë ditë, mes orës 20:00 dhe 22:55, efektivët e policisë me mandat gjyqësor zhvilluan një kontroll në banesën dhe hapësirat ndihmëse të D.S., 44 vjeç, në Tetovë. Gjatë këtij aksioni, u zbuluan dhe sekuestruan 66 fishekë gjuetie të kalibrit 12 mm, dy helmeta, dy pajisje kamerash për vëzhgim video dhe një kartë memorie.

Në kuadër të të njëjtit rast, është privuar nga liria edhe F.S., 58 vjeç, banor i Tetovës, i cili dyshohet se ka ofruar ndihmë për krimin, në bazë të nenit 24, si dhe për veprën penale të prodhimit, posedimit, ndërmjetësimit dhe shitjes së paautorizuar të armëve apo lëndëve plasëse, sipas nenit 396 të Kodit Penal.

Më tej, rreth orës 23:40, një tjetër person i quajtur F.S., 31 vjeç nga Tetova, u paraqit vullnetarisht në ambientet e SPB Tetovë për t’u marrë në pyetje lidhur me ngjarjen.

Të tre personat e arrestuar po mbahen në stacionin policor dhe pas përfundimit të hetimeve dhe dokumentimit të plotë të rastit, ndaj tyre do të depozitohen paditë penale përkatëse, përfundoi deklarata e SPB Tetovë.