Të nxehtit ekstrem rikthehet në Maqedoninë e Veriut, paralajmërojnë sinoptikanët

Pas një periudhe të shkurtër freskie, moti në Maqedoninë e Veriut po stabilizohet sërish, duke sjellë ditë me diell dhe temperatura në ngritje.

Drejtoria për Punë Hidrometeorologjike raporton se e nesërmja do të karakterizohet nga kthjellime dhe vranësira të lehta ose mesatare, me erë veriore të lehtë deri mesatare. Mëngjesi do të jetë relativisht i freskët, por gjatë ditës termometri do të shënojë sërish nivelet e zakonshme të stinës.

Maksimalet në të gjithë territorin do të variojnë midis 30 dhe 37 gradë Celsius. Kryeqyteti Shkup do të ketë mot të kthjellët, erë të lehtë nga veriu dhe temperatura pranë vlerës 35 gradë.

Meteorologët paralajmërojnë se kjo qetësi do të jetë e përkohshme. Duke filluar nga e marta, një valë e re e të nxehtit do të përfshijë vendin, dhe nga mesi i javës Shkupi do të regjistrojë 35-38 gradë Celsius, me ndjesinë termike mbi 40 gradë. Në zonat më të nxehta, termometri mund të prekë ose të tejkalojë pragun e 40 gradëve.

Intervali orar 11:00-17:00 do të mbetet periudha më e nxehtë e ditës. Ekspertët e shëndetësisë këshillojnë që qytetarët, sidomos të moshuarit, ata me sëmundje kronike, fëmijët dhe gratë shtatzëna, të evitojnë qëndrimin e gjatë në hapësira të hapura gjatë këtyre orëve.

Specialistët rekomandojnë pirje të shpeshtë të ujit, përdorimin e veshjeve të lehta dhe në nuanca të hapura, si dhe shmangien e sforcimeve fizike në orët e pikut të vapës.

Nëse parashikimi konfirmohet, vendi do të përjetojë një javë tjetër nën dominimin e një vale intensive të të nxehtit, me mungesë reshjesh dhe mbizotërim të kthjellimeve./INA/