Të martën hapet afati i dytë për regjistrimin në shkollat e mesme, në dispozicion 11,882 vende

Nxënësit që nuk arritën të regjistrohen në shkollën e mesme gjatë aplikimit të parë për vitin shkollor 2026-2027, do të kenë mundësi të aplikojnë sërish gjatë kësaj jave.

Sipas njoftimit të Ministrisë së Arsimit dhe Shkencës, raundi i dytë i regjistrimit në afatin e qershorit do të zhvillohet elektronikisht të martën, më 23 qershor.

Pasi të përfundojë aplikimi online, kandidatët më 24 qershor do të duhet të dorëzojnë dokumentet e nevojshme në shkollat përkatëse.

Rezultatet e regjistrimit, përmes listave të renditjes, do të shpallen më 25 qershor deri në orën 12:00, si në shkolla ashtu edhe në faqet e tyre zyrtare në internet.

Nëse në shkolla të caktuara paraqiten kandidatë me numër të njëjtë pikësh, atëherë më 29 qershor do të organizohet testimi kualifikues, ditë kur do të bëhen publike edhe listat përfundimtare të renditjes.

Në total, për aplikimin e dytë janë të lira 11,882 vende. Prej tyre, 7,404 janë për mësim në gjuhën maqedonase, 4,002 për mësim në gjuhën shqipe, 456 për gjuhën turke dhe 20 për gjuhën serbe.

Ministria e Arsimit bëri të ditur se në regjistrimin e parë aplikuan elektronikisht 15,075 nxënës, ndërsa 13,397 prej tyre u regjistruan.