Studeniçani ngre komision për evidentimin e dëmeve të shkaktuara nga stuhia

Komuna e Studeniçanit ka filluar procedurat për regjistrimin dhe vlerësimin në terren të pasojave të stuhisë së fuqishme që goditi Shkupin. Për këtë qëllim është ngritur një komision, i cili do të dokumentojë me procesverbal çdo dëm të konstatuar.

Moti i keq preku disa komuna të qytetit, ndërsa erërat e forta shkaktuan dëme të konsiderueshme materiale. Pemë të rrëzuara, çati të dëmtuara dhe ndërprerje të furnizimit me energji elektrike u raportuan në disa zona.

Në territorin e Studeniçanit, dëmet më të shumta u shënuan në sektorin e bujqësisë. Stuhia dëmtoi serra dhe kultura të ndryshme bujqësore, ndërsa pasoja pati edhe në disa objekte banimi, kryesisht në çatitë e shtëpive.

Kryetari i Komunës së Studeniçanit, Ejup Abazi, deklaroi se, fatmirësisht, stuhia nuk shkaktoi dëme të mëdha në komunë. Sipas tij, disa qytetarë kanë kontaktuar shërbimet komunale për të raportuar dëmtimet, të cilat janë evidentuar si në kultura bujqësore dhe serra, ashtu edhe në shtëpi e çati. Ai theksoi se pjesa më e madhe e dëmeve është regjistruar te kulturat bujqësore, veçanërisht në serrat e fermerëve.

Për shkak të mundësive të kufizuara financiare, pushteti lokal nuk është në gjendje t’i mbulojë të gjitha humbjet. Megjithatë, komuna po shqyrton hapësirën që ofron buxheti i saj për t’u ardhur në ndihmë qytetarëve të prekur.

Abazi bëri të ditur se komisioni i formuar nga komuna do të verifikojë në terren dhe do të evidentojë në procesverbal të gjitha dëmet. Dokumentacioni më pas do t’u dërgohet ministrive përkatëse. Mundësia e kompensimit nga buxheti komunal vazhdon të jetë në shqyrtim dhe do të përcaktohet në varësi të numrit të kërkesave të dorëzuara dhe shkallës së dëmeve.

Sipas kryetarit të komunës, pjesa më e madhe e kërkesave do t’u përcillet ministrive kompetente. Edhe në komuna të tjera janë parashikuar komisione të ngjashme për regjistrimin dhe raportimin e pasojave të stuhisë.

Pas përmbylljes së kontrolleve në terren pritet të përcaktohen më qartë përmasat e dëmeve dhe nevojat për mbështetje. Autoritetet komunale do t’ua dorëzojnë raportet institucioneve përgjegjëse, ndërsa qytetarët presin ndihmë për të përballuar pasojat e motit të keq.